GIAWHAG sa konseho ang Cebu City Transportation Office (CCTO) sa pag-abli og balik sa intersection sa South Road Properties aron maka-left turn ang mga sakyanan gikan sa Barangay Mambaling aron moluag ang dagan sa mga sakyanan gikan sa N. Bacalso Ave. samtang nagpadayon ang katukoran sa underpass.
Si Konsehal Joy Pesquera ni-sponsor sa resolution aron pormal nga awhagon ang CCTO nga ilawom sa buhatan ni Mayor Tomas Osmeña.
Ang mayor nipasira sa tanang intersection sa South Coastal Road nga naglagbas sa South Road Properties aron di na makaliko ug makabalik sa agi ang mga sakyanan gawas lang sa viaduct aron malimitahan ang disgrasya.
Gumikan niini, ang mga sakyanan nga gikan sa south Cebu di na makaliko paingon sa Mambaling inay adto sila moagi sa viaduct duol sa Barangay Pasil ug ang gikan usab sa Mambaling dili na maka-left turn paingon sa Plaza Independencia kon dili sila moagi sa viaduct didto sa utlanan sa Talisay diin mosubay og taastaas nga karsada ang motorista.
Si Francisco Ouano, operations head sa CCTO, niingon nga di apektado ug hapsay ang dagan sa mga sakyanan sa SRP gikan sa Mambaling subay sa ilang assessment ug di nila ablihan og balik aron malimitahan ang disgrasya sa lugar.
Si Osmeña, sa iyang bahin, nagkanayon nga human gisirad-an ang mga u-turn slot sa SRP lakip na ang junction sa Mambaling, nimenos na ang disgrasya sa SRP ug di siya pabor sa pag-abli niini og balik sanglit iyang gitinguha mao ang kalusawasan sa mga motorista bisan kon layo na ang ilang daganon. (PAC)