MAYOR sa usa sa mga lungsod sa lalawigan sa Bohol gireklamo sa iyang asawa ngadto sa Office of the Ombudsman Visayas human niya nasakpan nga kuyog ang giingong kabit niini sulod sa usa ka pension house nga anaa sa laing lungsod gihapon sa Bohol.
Ang asawa nga si Maria (di tinuod nga ngalan) niduso og reklamong disgraceful and immoral conduct ug conduct unbecoming of a public officer batok sa mayor.
Di lang una nganlan ang mayor ug ang lungsod nga iyang gi-alagaran samtang wa pa siya makuhai sa iyang habig.
Sa iyang complaint-affidavit, gisaysay ni Maria ang giingong pagkalambigit sa iyang bana ngadto sa laing babaye sukad pa niadtong 2010, apan sa miaging tuig lang niya kini nasakpan akto nga kuyog ang giingong kabit.
Kasal si Maria sa mayor sukad pa niadtong 1978 ug duna silay upat ka mga anak.
Matod niya, 2010 dihang nakadungog na siya og mga hungihong labot sa giingong pakig-relasyon sa iyang bana ngadto sa usa ka menor de edad.
Ang maong menor de edad giingong usa ka SK chairman sa usa sa mga barangay sa lungsod, diin nag-serbisyo ang mayor.
Pipila ka higayon na nga gisuwayan ni Maria ug sa iyang anak pagpangutana ug pag-komprontar ang ang batan-on niadtong tuig 2011 apan giingong nisalikway kini sa pasangil nga may relasyon sila sa mayor.
Giasoy ni Maria nga samtang tua siya sa Amerika niadtong Pebrero 2017, nitawag kaniya ang mayor ug niangkon na nga may relasyon sila sa maong babaye ug nga wa na siya’y gugma alang kaniya (asawa).
Dihang nabalik si Maria sa Pilipinas niadtong Mayo 2017, gipadayag niini, nga wala na makigkita kaniya ang iyang bana.
Nakaabot usab niya ang mga impormasyon nga kanunay nga makit-an ang mayor nga ka-date ang giingong kabit niini sa hotel ug uban pang mga dapit.
“Respondent has already abandoned his marital and familial obligations to me and his family,” niingon si Maria.
Hulyo 12 sa miaging tuig, nakadawat og tawag sa telepono ang anak lalaki ni Maria gikan sa wa magpailang caller nga anaa ang presensiya sa mayor ug karelasyon niini sa usa ka pension house sa laing lungsod, didto gihapon sa Bohol.
Nangayo una og tabang sa pulis si Maria ug ang iyang anak sa wa pa hingpit nga niadto sa pension house, diin giingong ni-check in ang mayor.
“Upon arrival, we asked the security guard on duty if there was a (mayor) or a (ka-relasyon ni mayor) who had checked in. When the security guard confirmed, he went to Room No. 4 and knocked on the door, telling the guests therein that somebody was looking for (mayor),” tipik sa complain-affidavit ni Maria.
Ang mayor nga nagtapis lang og tuayla nibukas sa pultahan ug nakit-an ang babaye nga diha naghigda sa katre ug mabdos.
Dihang nakakita kaniya, sa iyang anak nga lalake ug pulis, nangluspad ang mayor ug nakugang.
“Respondent closed the door again and after a few minutes, opened the door widely. This time my husband was already fully clothed,” dugang sa asawa.
Dinhi na matod pa nisulod ang iyang anak sa kwarto ug nikuha og video sa iyang amaha’ng mayor kauban ang babaye.
Nagka-engkwentro pa ang mayor ang iyang anak human gipugngan siya sa opisyal sa pagkuha og video. Dugang ni Maria, dali nga nigawas ang mayor ug ang babaye sa kwarto, dihang iya kining gisundan, gipadayag niya nga gisukmag siya sa opisyal diha sa iyang ulo ug siko.
Dali sab nga nanakay sa sakyanan nga iya sa pamilya sa mayor ang duha.
“It is very clear therefore that (the girl’s) illicit relationship with no less than the Mayor of __________, who is a married man with four children,” tipik sa reklamo. (AZDL)