SA usa lang ka hugna sa operasyon, nasikop sa Cebu City Transportation Office (CCTO) ang ilang kaugalingong traffic enforcer nga mi-counterflow.
Ang mao nga enforcer nalakip sa 45 ka mga drayber sa motorsiklo ug laing tulo ka private cars nga naatlan nga ni-counterflow sa dalan Echavez sa niaging adlaw.
Si Francisco Ouano nagkanayon nga nakadawat sila og report gikan sa mga tawo nga adunay daghang mo-counterflow sa maong lugar nga kalapasan sa Executive Order 034 ni Mayor Tomas Osmeña mao nga nihimo sila og operasyon.
Matod pa ni Ouano nga positibo ang taho sa netizen sanglit naglinya ang mga motorsiklo nga gustong mouna sa taas nga linya sa sakyanan atol sa stop signal diin didto na sila niagi sa karsada sa ilang kasugat.
Ang mga drayber giisyuhan og citation ticket ug ang ilang mga motorsiklo ma-impound sa warehouse sa Bigfoot sa South Road Properties sulod sa usa ka buwan.
Ang administrative penalty nga P500 sa ilang violation di na pabayran ni Osmeña ug ang 30 ka adlaw ra nga impounding ang ilang serbisyohan.
Enforcer ni-counterflow
Wa makalinggawas sa mga kamot sa iyang mga kauban si traffic enforcer Belden Medel, kinsa off-duty sa miaging adlaw, apan ni-counterflow sa General Maxilom Avenue.
Sama sa 48 ka drayber, ang motorsiklo ni Medel giimpound sa CCTO ug iyang makuha ining labay sa 30 ka adlaw.
Matod pa ni Ouano nga di nila tugotan nga abusohan sa ilang mga kauban ang balaod nga ilang gipatuman apan iyang gipadayag nga kon ang enforcer moresponde og alarma, hayan dili nila dakpon kon mo-counterflow sanglit apil kini sa ilang trabaho.
Samtang gihingusgan karon sa CCTO ang pag-tow sa mga motorsiklo nga gi-park sa sidewalk ug ang masakpan makabayad og P2,000 nga penalty.