MGA motorista nga magbiyahian agi sa Cebu South Coastal Road sa Talisay City giawhag sa pagpangandam sa “gamay” nga kalangan sa trapiko sugod ugmang adlawa.
Ang City of Talisay Traffic Operations and Development Authority (CT-TODA) niandam na og traffic scheme alang sa rehabilitation ug pag-ayo sa Mananga Bridge 3 sa Cebu South Coastal Road.
Ang Department of Public Works and Highways (DPWH) 2nd Engineering District mosugod sa pag-ayo ugmang adlawa.
Ang rehabilitation sa northbound lane sa bridge, nga gigastuhan og P29 milyones, molanat hangtod sa ikaduha o ikatulong semana sa Hunyo, matod ni DPWH 2nd Engineering District head Leslie Anthony Molina.
Si Engr. Almond Dela Peña, CT-TODA head, niingon nga bisan kon ang contractor magsugod na sa ilang pagtrabaho ugma sa gabii, ang tulo ka lanes sa Mananga Bridge 3 magpabiling bukas.
Ang duha ka lanes magpabiling bukas sa mga motorista nga padung sa Cebu City samtang ang usa bukas alang sa southbound nga mga sakyanan gikan sa alas 6 sa buntag ngadto sa alas 12 sa udto.
Gikan sa udto ngadto sa alas 10 sa gabii, ang CT-TODA mobukas sa duha ka lanes alang sa mobiyahe padung sa south ug usa padung sa Cebu City, matod ni De la Peña.
Ang mga traffic enforcer gikan sa CT-TODA ipakatap sa masig katumoy aron mapugngan ang paghuot sa trapiko.
Alternatibo
Gitumbok ni de la Peña ang alternatibong mga agianan sa mga motorista kon ganahan silang molikay sa trapiko sa CSCR.
Mga motorista makagamit sa alternatibong mga rota gikan sa Barangay Tabunok ngadto sa dan Rabaya ug Fidel Bas st. ngadto sa San Isidro Road.
Duna say diversion road gikan sa Barangay Linao, apan tungod sa nagpadayong road rehabilitation, mga motorista gitambagan nga di mogamit niini sa pagkakaron.
Nagpaabot si De la Peña sa gamay nga congestion sa trapiko sa Mananga Bridge 3 kay ang pag-ayo giatol sa summer vacation, diin minos lang ang mga biyahe matag adlaw. (SunStar Cebu)