Feasibility study sa BRT susihon; 10 ka adlaw gitagal sa di pa kini hukman

IPASUSI sa National Economic Development Authority (Neda)-Investment Coordination Committee ang feasibility study nga gihimo sa Bus Rapid Transit sa dakbayan sa Sugbo.

Kini nauyonan atol sa gipahigayon nga panagtagbo sa mga opisyal sa Neda-ICC sa Banko Sentral ng Pilipinas sa Manila diin ilang gituki ang problema sa traffic sa Cebu nga gitambungan mismo ni Secretary Michael Dino.

Si Dino nagkanayon nga kuhaon sa Neda-ICC ang technical service consultant (TSC) aron maoy modumala sa feasibility study sa maong mass transport gumikan sa pagduda nga di mohaom ang BRT gumikan sa kahagip-ot sa dalan nga lagbasan kansang rota manukad gikan sa barangay Bulacao paingon sa Talamban.

Ang Department of Transportation (DOTr) pinangulohan ni Secretary Arthur Tugade uban ni Dino niduso sa ilang rekomendasyon pagkanselar sa BRT ngadto sa Neda-ICC.

“I fully support Neda-ICC’s action to hire a TSC in order to conduct a second look whether or not to cancel the Cebu BRT Project,” matod ni Dino.

Ang City Government pinangulohan ni Mayor Tomas Osmeña nipadala na usab sa ilang suwat nga nagdepensa sa BRT ngadto sa buhatan ni Secretary Carlos Dominguez, chairman sa Neda-ICC.

Matod pa ni Dino, kinsa nikutlo sa pamahayag ni Dominguez, nga basehan sa ilang desisyon mao ang rekomendasyon sa DOTr.

Gipadayag usab niya nga gibutyag ni Tugade nga di haom ug hingpit nga solusyon ang BRT sa problema sa traffic sa Cebu.

Gitug-an ni Dino nga gusto ni Tugade ug Dominguez nga masulbad ang maong problema sa mosunod nga katuigan.

Gihatagan sa secretary sa Department of Finance og 10 ka adlaw aron maplanohan ang kasulbaran sa trapiko sa Cebu uban sa paghatag og kapilian nga mga solusyon.

“We cannot have a project that will create more traffic gridlock. Secretary Tugade is going to give Cebu a basket of solutions from geometric improvement like flared intersections, green-ways, intelligent traffic signaling system,” dugang ni Dino.

Ang Neda uyon sa pagpatuman sa BRT project kay nahan-ay na ang tanang gikinahanglan niini. (PAC)