GI-CLASSIFY nga financier sa Philippine Drug Enforcement Agency (PDEA) ang usa ka lider sa relihiyosong grupo human kini nasikop pinaagi sa search warrant operation sa Barangay Macabalan, dakbayan sa Cagayan de Oro niadtong Abril 24, 2018.
Sikop si Rasol Sarip, 60, minyo, residente sa P-Narra, Barangay Macabalan ning siyudad.
Giingong usa kini ka financier ug notorious nga drug trafficker kinsa gikonsiderang high-value target (HVT) sumala sa PDEA-Northern Mindanao.
Nagpahigayon ang mga otoridad og operasiyon pagtunol sa search warrant pinaagi na usab sa Maritime Police sa pagpangulo ni Police Chief Inspector Pedro Gorre Jr., 1001st MARPSTA RMU10; Police Superintendent Ricardo Enriques Villanueva, RC RMU10; Police Station Bicol Region (PS5) sa Macabalan sa pagpangulo ni Police Chief Inspector Enrique Belaca-ol ug PDEA-Northern Mindanao ubos ni Director Wilkins Villanueva hinungdan sa pagkasikop sa suspetasado.
Sa pakighinabi sa SunStar SuperBalita kang Gorre, gibutyag niini nga taodtaod na nga gipanid-an sa mga otoridad ang suspek hinungdan nga gikasa ang operasiyon sa dihang aduna na kini search warrant.
“So far ang intelligence report namo, gi-monitor namo ni one year na karon lang nasapon gyud. Financier siya sa drugs, siya ang naga finance para i-purchase ang drugs, diri siya ang front line,” pahayag ni Gorre.
“Imam gyud siya, gani iyang balay naa sa tapad sa mosque, overland ang drugs gina pick-up lang,” dugang pa niini.
Samtang gipanghimakak sa suspek ang alegasiyon gumikan kay ang negosyo niya mao man ang mga alahas ug aduna usab kini mga gipaabangang mga boarding house.
Nakumpiska gikan sa maong pinuy-anan sa suspek ang siyam ka mga pakete sa shabu nga adunay gibana-banang gimbug-aton nga 35 gramo nga gibana-banang nagkantidad og P175 mil; 1 glock 19 9mm pistol; 1 magazine sa 9mm; 1 ka 9mm 32 rounder empty magazine; 5 ka bala sa cal 9mm; 2 ka bala sac al.40; 1 ka bala sa kalibre. 45; 1 ka pakete sa mga nagkadaiyang klase sa alahas, Samsung galaxy note ug P18 mil nga kwarta.
Nasayran ang maong search warrant adunay numero nga SW No. 04201858 kalabot na sa pagkalambigit niini sa illegal drugs and paraphernalias nga gi-isyu ni Judge Dennis Alcantara, RTC Branch 18.
Samtang sikop usab sila Jelowen Abas, 42, usa ka ug residente sa San Jose Libona, Bukidnon ug ang helper nga si Paquito Cena, 22, nga residente usab sa susama nga dapit sa gipahigayon nga drug bust sa Corrales Extension, Barangay Macabalan.
Gibutyag ni Gorre nga taodtaod na usab kini sila nga gipanid-an sa kapolisan ug malampuson kining nasikop human sa pagkasa sa operasiyon.
Giingong ang mga parokyano niini mao ra usab ang mga driver sa mga cargo nga anaa sa port kinsa gapangbiyahe og lagyo.
Nasayran nga gamit ang P1,000 napalitan ang mga suspek ug nakuhaan pa kini og 0.5 gramo sa shabu nga nagkantidad og P5 mil.
Nagtingkagol na sa mini-cell sa PS5 ang mga dinakpan.