SECTIONS
Monday , May 21, 2018
SUPERBALITA CEBU

Mas lisod na ang tahas sa RP Gilas

IMBES nga magproblema kon kon unsaon pagbuntog ang posibleng molig-on pa’g samot nga puwersa sa Australia Boomers, si Gilas Pilipinas coach Chot Reyes mas nagtutok sa positibong bahin – daghan sila’g makat-unan.

Ang Gilas ug Boomers mag-abot pagbalik karong Hulyo sa Philippine Arena sa Bulacan alang sa window 2 sa FIBA World Cup qualifiers apan ning higayuna, nalantawan nga mas molig-on pa ang haligi sa Boomers.

Kini gumikan kay dako ang purohan nga moduwa sa Boomers ang 7-footer nga si Andrew Bugot, kinsa bag-uhay lang mianunsyo sa iyang pagretiro sa National Basketball Association (NBA).

Giklaro ni Reyes nga giisip kini nilang dakong hagit ug andam silang mosagubang niini.

“Great for us,” matod ni Reyes sa interbyu sa Spin.ph. “The stronger they are, the better experience for our players.”

Si Bogut, kinsa maoy No.1 overall pick sa NBA niadtong 2005 ubos sa kampo sa Milwaukee Bucks, mipirma og og kontrata sa Sydney Kings alang sa National Basketball League (NBL), usa ka liga sa Australia.

Sa iyang pagretiro sa NBA, si Bogut nagkanayon nga nakatutok siya karon nga matabangan ang Kings nga makalangkat og titulo sa NBL.

Gawas niini, mihisgot sab si Bogut sa iyang plano nga moduwa siya pagbalik sa Boomers alang sa 2019 World Cup ug 2020 Tokyo Olympics.

“The World Cup next... obviously the Olympic Games,” batbat pa ni Bogut sa interbyu sa Daily Telegraph.

“I’m all for playing for the national team in those two events.”

Ang 33 anyos nga si Bogut, kinsa sulod sab sa 13 ka mga tuig nga nagduwa sa NBA, ningduwa sa Australia national squad alang sa matag upat ka mga tuig nga Olympics gikan niadtong 2004 Athens Games hangtod sa 2016 Rio Games.

Gawas kang Bogut, posibleng aduna pa’y laing mga magduduwa sa NBA ang mopakita’g aksyon alang sa Boomers.

Ang Australians nga kasamtangang nagduwa sa NBA mao sila si Ben Simmons sa Philadelphia 76ers, Patty Mills sa San Antonio Spurs, Dante Exum ug Joe Ingles sa Utah Jazz, Aron Baynes sa Boston Celtics, Matthew Dellavedova ug Thon Maker sa Milwaukee Bucks, ug Mangok Mathiang sa Charlotte Hornets.

Hinuon dili pa segurado kon makaduwa ang nangahisgutan alang sa Boomers.

Sa premiro nilang pagpakigsangka sa Gilas sa window 1 sa World Cup qualifiers, ang Boomers wala’y mga sakop sa NBA apan bisan pa niini, ilaha gihapong namakmak ang Gilas, 84-68. (ESL)


VIEW COMMENTS