ELEKSIYON na sab sa Barangay ug Sangguniang Kabataan (SK) officials sa umaabot nga Mayo 14 sunod bulan. Daghan ang mi-file sa ilang certificate of candidacy (COC) kay gustong mahimong kapitan o kagawad sa ilang barangay kay mangalagad kuno sa katawhan.
Daghan ang nagaduda nga dili tanan nga nakalingkod sa ilang puwesto mga tinuod nga pinili sa katawhan tungod duna kunoy manipulasyon sa resulta sa piniliay. Daghang mga dapit nga sayo nahuman ang pag-ihap sa mga boto sa katawhan apan dugay ang proklamasyon sa mga midaug nga nanagan. Naumol sa hunahuna sa katawhan nga dunay nagamaniobra diin ginapahigayon ang dagdag-bawas aron modaug ang ilang ginapaboran nga kandidato pinaagi sa tikas.
Sa miaging Presidential elections niadtong 2016, dili lang unta 16 million ang boto nga nakuha ni Presidente Rodrigo Duterte kundili 21 million apan 5 million niini ang gikuha ug gidugang kang Mar Roxas nga kandidato sa Liberal Party.
Wa misaler ang pagpanikas kay dili gyud mabangbang ang suporta sa katawhan kang Digong uban sa paglaum nga iyang haw-ason ang nasud sa kalisud ug sa kamot sa mga kriminal.
Tungod kay wa nay paglaum ang LP (Liberal Party) nga modaug ang ilang panglaban kang Digong, ang boto ni Leni Robredo ang namaniobra kontra kang Bongbong Marcos.
Mayo 14 sa gabii milabaw si Bongbong og 1 million ka boto kang Robredo apan pagmata sa katawhan sa sunod nga adlaw sutoy pa sa kwetis ang boto ni Robredo dihang misulod ang boto sa Camarines Sur ug sa probinsiya sa Iloilo.
Sa resulta nga gipagawas sa Commission on Elections (Comelec), midaug si Robredo sa boto nga 14,418,817 kontra 14,155,344 kang Marcos diin siya milabaw og 263,473 ka boto.
Sa atong yano nga pagsabot, mipagamit ang Comelec nga nahimong kunsabo sa pagpanikas sa administrasyon niadtong panahona ug dili ko motuo nga mopagamit lang ang mga opisyal sa Comelec nga walay kapalit. Pila kaha matag usa ug duna pa ba kahay nagpabilin sa katungdanan hangtud karong panahona?
Posible nga walay hanaw si Robredo sa gibuhat sa iyang kapartido niadtong panahona apan karon taas noo pa ba kaha siya nga moatubang sa katawhan nga moingon nga siya gyud ang lihitimo nga Bise Presidente sa katawhan?
Karon nga ginabuhat sa iyang kampo ang tanang depensa apil ang pagbasa sa mga balota aron dili maihap sa mga presinto diin gipa-recount ni Bongbong nganong midaug siya, wa ba siya nagduda nga dunay pagmaniobra aron lang magpabilin siya sa puwesto o iya na bang gibaligya ang iyang kaligdong tungod lang sa posisyon nga dili unta iya?
Si Robredo mismo ang nagkanayon nga "political distraction" ang pagpa- recount o protesta ni Bongbong sa mga boto sa 132,446 ka presinto. Kon siya kaha ang nakasinati sa maong pagpanikas okay lang ba kaniya?
Katungod ni Bongbong nga depensahan ug ipaglaban sa legal nga paagi aron mapamatud-an nga gitikasan siya. Nganong ang sobra nga mga balota naa may shade ang pangalan ni Robredo? Nganong nabasa man ang balota nga matud sa Comelec weather proof ug water proof man ang ballot boxes?
Matud ni Atty. Romulo Macalintal nabasa kuno ang mga balota tungod dunay natigayon nga bagyo sa Camarines apan upat naman to ka bulan ang nakalabay! Ayaw na ta, Tits, wa mi gipanganak kagahapon!
Sa mga dili makadawat ugaling modaug si Bongbong sa recount, wa tay mahimo kon maoy gusto sa kadaghanan.