DAVAO DEL SUR -- Hugtanong gikondena sa pamuno sa 39th Infantry Battalion (IB), Philippine Army ang mga rebeldeng New People's Army (NPA) tungod sa paggamit og mga menor de edad sa pakiggubat sa gobyerno.
Sumala ni Lieutenant Colonel Rhojun Rosales, 39th IB commanding officer nga si Rondi Ondo, molupyo sa Makilala, North Cotabato, ang 15 anyos pa lamang dihang namatay sa engkuwentro sa lungsod sa Sta. Cruz, niadtong Sabado, Abril 21.
Matud ni Rosales nasayran nga ang batan-ong gerilya namatay human nahitabo ang panagsangka sa Sitio Bayongon, Barangay Astorga.
Narekober sab gikan sa posisyon ni Ondo ang usa ka M16 rifle ug kolor itom nga NPA uniform.
Sumala niini nga si Ondo positibong giila sa inahang si Marissa human gipalaiwom sa Scene of the Crime Operatives ang otopsiya.
Matud sa 39th IB nga angayang di gamiton sa mga walhong komunista ang mga menor de edad sa ilang way klarong kawsa nga pag-rebelde sa gobyerno.
Apan ang inahan ni Ondo hugot nga milimod nga sakop sa NPA ang iyang anak ug gihimo lamang kining rason sa militar aron matabonan ang damyos sa ilang gubat.
Gipasiatab niini nga ang kuyog sa iyang anak ang uyoan niini aron manguha og lubi sa umahan dihang kalit naigo sa bala gikan sa sniper.
Ang inahan ni Ondo mitambong og kalihukan sa simbahan sa lungsod sa Makilala, North Cotabato dihang nahitabo ang gubat.
Kahibaloang gawas kang Ondo, apil nga napatay si Julito Pueblas, kinsa gitudlong kumander sa Sentro de Gravidad sa NPA ug maoy tigsabwag og kasamok sa Davao Region.
Anaa na sab sa selda sa kapulisan sa Sta. Cruz, ang amasonang si Jessa Lumana, 22, human nasikop sa paghupot og eksplosibo atol sa engkuwentro. (Orlando B. Dinoy)