GIKAKURAT ni Misamis Oriental Governor Yevgeny Vincente Emano nga mikita ang parke sa Kapitolyo.
“Dili ko makatoo nga ang atong parke mikita og dakong kantidad nga wala man kini mikita kaniadto,” kini ang pahayag ni Governor Bambi Emano human nadungog ang report sa Clean and Green Maintenance sa Kapitolyo sa pagpangulo ni Ms. Lorna Guibone kagahapon atol sa pagpakayab sa nasudnong bandila sa hawanan sa kapitolyo.
Mihatag og report si Guibone sa mga kalamboan ug pagpatuman nga gihimo sa ilang buhatan sa Maintenance sa kapitolyo.
Gibutyag niini nga sa tuig 2017 miabot ngadto sa P1,014,108 ang kita sa parke sa kapitolyo nga gilangkoban sa parking fee, rental fee sa mga vendors sa kapitolyo, bayad sa comfort room, magbutang og tarpulin ug uban pa.
“Kung tan-awon among buhatan ang among mandate sa clean and green maintenance mohimo og janitorial work ug pagpagwapa sa capitol park apan dili lang diay mi expert niana tungod kay we gathered and collected P1,014,108.00 for the year 2017 and remitted it to Provincial Treasurer's Office,” mapasigarbuhon nga pahayag ni Guibone.
Gidayeg ni Bambi ang grupo sa Maintenance tungod kay kaniadto wala kini mikita og ingon ani nga kantidad.
“Imagine you were all able to earned more than a million pesos as income for the Provincial Capitol which i got never heard previously nga dunay kita kita atong parke atong CR. Karon lang makita sa atong katawhan nga tataw, dayag ug dunay kasihag ang imong pagpamunoan isip punoan nato sa maintencae sa kapitolyo probinsyal,” pagdayeg ni Bambi kang Guibone.
Dugang ni Bambi nga usahay dili na mabantayan sa uban nga empleyado kung unsa ilang nahimo sa Maintenance sayo pa sa kadlawon, ulan ug init aron lamang pagsulod sa trabaho sa uban empleyado limpyo na ang hawanan sa kapitolyo.
“Let me thank all of you... some of us wala namo nalantaw ang kalimpyo sa kapitolyo usahay dili namo masukod nga kadlawon pa nanglimpyo para matag adlaw matahom maanyag ug ambungan ang atong hawanan sa kapitolyo,” dugang ni Emano.
Nihangyo sab ang buhatan og napulo ka job order aron makatabang pa sa pagpahapsay sa kapitolyo ug kini iyang aprobado. (SVB)