NAPALGANG naglutaw ang usa ka batan-on human gituohang nalumos sa Iponan river niadtong Miyerkules, Abril 25, ning dakbayan sa Cagayan de Oro.
Ang biktima naila nga si France (dili tinuod nga ngalan), 18 ug residente sa Iponan.
Sa nahipos nga impormasiyon, gikabutyag nga wala’y nakitang foul play sa kamatayon sa biktima gumikan kay wala’y mga nakitang samad o bisan unsa nga tima-ilhan nga kini gipasipad-an.
Gikabutyag nga naligo ang biktima nga nag-inusara niadtong Martes sa hapon apan kalit lang nahanaw.
Kumbinsido usab ang amahan sa batan-on nga wala nagpakamatay ang anak human mitumaw nga taho nga naghikog kay walay rason nga magpakamatay.
Apan gi-angkon niini nga nakasinati og depresiyon ang anak apan dili igong rason nga maghikog.
“Naa’y iyang subject nga wala niya napasaran, mao raman na akong nabantayan sa iyaha, pero murag wala man niya gibutang sa iyahang, okay ra man sa iyaha,” pahayag sa amahan sa biktima sa interbyu sa usa ka sibyaan.
Kasamtangang anaa na sa usa ka punerarya ning dakbayan ang nahisgutang patay nga lawas sa biktima kinsa gi-atiman na sa nahabiling pamilya.