GIPAHIGAYON ang peace covenant signing kagahapon sa buntag alang sa mga kandidato nga buot magpapili sa umaabot nga eleksiyon sunod bulan diha sa Barangay Nazareth, dakbayan sa Cagayan de Oro.
Nasayran nga ang tumong ug tuyo niini mao nga masigurado nga mamahimong malinawon ug han-ay ang eleksiyon alang sa Barangay ug Sangguniang Kabataan (SK) eleksiyon.
Gibutyag ni Atty. Ramil Acol, City Comelec officer, sa pakighinabi sa SunStar SuperBalita nga aduna’y gamay nga pagpasabot ug mga mensahe alang sa mga kandidato aron nga dili mag-away away ug malinawon gayud ang ipahigayong eleksiyon sunod bulan.
“Naa’y briefing gamay, naa’y mga mensahe sa atong uban nga mga stakeholders like sa police ug Parish Pastoral Council for Responsible Voting (PPCRV), tanan na ni, peace covenant nga mag-angay-angay ang mga kandidato nga peaceful ta ba, dili mag-away away,” dugang pahayag niini.
Giingong gi-aghat nila ang mga kandidato sa paglakip sa covenant signing diin sa ila gayud nga kabubot-on ug giklaro nga gipadalhan na kini sila og mga notice apan wala usab sila’y mahimo sa wala motunga nga kandidato.
“Amo silang gi-obligar, gi-noticesan nato sila, dili pud nato mapugos sa dili motunga, dili na peace kung atong pugson, kabubut-on ra gyud,” dugang ni Acol.
Tipik usab sa ilang gipahibalo atol sa covenant signing nga mao ang angayang pagabuhaton panahon sa campaign period sama na lamang sa mga pagpatapot sa posters sa saktong lugar o sa common poster area.
Gidugang pa usab nga panglangkaton ang mga poster o mga election paraphernalia nga nakabitay diha sa mga punoan sa kahoy ug uban pang dapit diin dili sa area nga gitugot lamang sa tinugyanan sa Commission on Election (Comelec).
Padayon usab nga nagpahimangno ang tinugyanan sa Comelec nga likayan ang overspending o paghinubra sa mga paggasto alang sa eleksiyon labi na ang vote buying o pagpamalit sa mga boto.