GIBUTYAG sa komitiba sa public utilities nga adunay pagsupak sa grupo unta sa gisugyot nga usbaw nga P1 sa pletehan apan nakumbinsi ra usab kini.
Sa pakighinabi sa SunStar SuperBalita kang Kagawad Teodulfo Lao Jr., chairperson sa public utilities committee, mibutyag nga gi-aprobahan na sa kumitiba ug giduso na sa City Council ang petisiyon sa duha ka mga grupo sa motorela.
Positibo usab kini nga aprobahan kini sa konseho gumikan na usab kay nabati-an nila ang panginahanglanon sa pag-usbaw sa pletehan ug gani lakip ang mga pasahero ang nag-indorso usab sa pag-usbaw og P1 nga pletehan.
“Atong committee just only recommended, it’s up to the council kung pananglitan mo-object sila wala ta’y mahimo at least akong gi-endorse but hopefully, ila man sab nabati even our commuters ga-endorse for P1 fare hike,” pahayag ni Lao.
Gidugang pa usab niini nga dili unta mosugot ang grupo sa mga motorela drivers gumikan kay dili kini pa-igo tungod na usab sa nagkamahal nga mga palitunon ug naghangyo nga dungagan apan gipasabot usab niini nga tan-awon usa una ang reaksiyon sa mga sumasakay ug naakumbinsi ra usab kini.
“Dili unta sila mosugot, pwedi ba dungagan? ingon pa nato diha lang sa ta sa P1 tan-awon sa nato ang reaction sa mga commuters,anyway ang provision nato didto every 5 years e-evaluate unlike karon, kanus-a magtaas ang gasolina, ga-base man gud sa rate sa gasolina, inflation rate ang atong basehan kung pananglitan taas ang inflation rate pwedi magdemand,kay unsaon man pagpalit nla sa ilang needs,” dugang pa niini.
Ang pletehan mosaka gikan sa P6 ngadto na sa P7 alang sa minimum nga pletehan, P5 ngadto na sa P6 alang sa mga estudyante, senior citizens ug mga persons with disabilities (PWDs) ug P2 ngadto na sa P3 alang sa mga kabataan.
Nasayran nga mo-epekto gyud dayon ang bag-o nga fare matrix o usbaw sa pletehan sa motorela kung ma-aprobahan na kini sa konseho.