SI Department of Transportation (DOTr) Secretary Arthur Tugade ug si Presidential Assistant for the Visayas Michael Lloyd Dino mirekomendar nga kanselahon ang P16 bilyunes nga Bus Rapid Transit (BRT) Project sa syudad sa Sugbo.
Ang ilang rekomendasyon, nga gibutang sa usa ka sulat nga penetsahan og Abril 11, 2018, gipadala ngadto sa Investment Coordination Committee (ICC) sa National Economic Development Authority (NEDA) nga gipangulohan ni Finance Secretary Carlos Dominguez.
Nagpasabot ba kini nga niabot na sa dead-end ang BRT? Matawag ba nato nga “goodbye, my teacher, goodbye” na ang BRT ni Cebu City Mayor Tomas Osmena?
Si Osmeña ug si Dino parehong naningkamot nga masulbad ang kahuot sa trapiko sa syudad sa Sugbo. Si Osmeña maoy niduso sa BRT nga gisupak ni Dino kay matod pa niya di kini makasulbad sa suliran sa trapiko sa syudad. Ang Sugbo karon aduna nay kapin sa 800,000 ka mga sakyanan nga nagdagan, kadaghanan niini sa Metro Cebu.
Si Dino, sa laing bahin, niduso sa Light Rail Transit (LRT) system, di lang sa syudad sa Sugbo, kon di sa entiro Metro Cebu. Matod pa ni Dino, ang LRT masakyan og 8,000 ngadto sa 9,000 ka mga pasahero kada oras, samtang ang BRT masakyan lang og 3,000 ka mga pasahero matag oras.
Dugay nang giplano ang BRT. Apan nalangay ang pagpatuman niini, lakip na ang pagpalit sa road right of way aron palapdan ang dugay nang naghuot nga mga karsada nga agian sa BRT. Kulbahinam pa kon di ba kanselahon ang maong proyekto.
Si NEDA Secretary Ernesto Pernia, atol sa usa ka Philippine Economic Briefing dinhi sa Sugbo, niingon nga dangtan pag pipila ka mga tuig ang pagtukod sa LRT, sukwahi sa pamahayag sa usa ka tigpamaba sa usa ka Chinese-Singaporean consortium nga mahimong kasugdan na ang ilang giproponer nga P155 bilyunes nga LRT sa sunod tuig.
Samtang ang NEDA-ICC mag-hire pag mga technical service consultants aron pagrepaso sa BRT, laing dugang kalangay sa maong proyekto.
Kon dali ra ang pagpatuman sa LRT, hayan ma-obertikan niini ang BRT. Mas nindot gyud unta kon giduso na ang LRT kaniadto. Magdungan untag kahuman ang BRT ug LRT. Kana lagi kon di sab malangay ang LRT.