Nalzaro: Taga media sa pulitika

BASE sa akong nahibaw-an, ubay-ubay sa atong kaubanan sa media labi pa sa broadcast ang mipakita usab og interes nga mosalmot sa umaabot nga bugnong lugaynon alang sa barangay. Kon buot natong huna-hunaon, kining pagpanibya usa na baya kini sa klase sa serbisyo publiko. Usahay, kami diri sa media, maoy dangpanan ug kasandigan sa mga tawo nga nagkinahanglan og panabang.

Maka-ingon ko nga dili pa siguro igo kining maong papel nga gidala sa mga sakop sa media sa ilang propesyon. Ug ila pa kining pun-an pinaagi sa pagserbisyo sa barangay diin sila nagpuyo o nahisakop. Pag-alagad sa barangay mao ang nag-una nilang tumong.

Sa dySS Super Radyo Cebu lang, adunay upat ka mga molansar sa umaabot barangay eleksiyon. Si Apas barangay councilor Super Allan Majait, manimpalad sa paglansar isip barangay captain. Last term na si Allan sa pagka-konsihal. Siya unta ang gisaaran ni Kapitan Ramil Ayuman nga maoy palansaron isip kapitan. Apan ang maong saad wala man matuman kay ang asawa man ni Ramil ang iyang gipalansar. Busa nanimpalad na lang si Allan isip independente nga kandidato.

Si Super Gabriel Bonjoc, kinsa last term usab sa pagka-konsihal sa Poblacion, Talisay City, manimpalad sa paglansar sa pagka-kapitan. Daghan usab og natampo si Super Gabriel sa iyang barangay sulod sa pipila ka tuig niyang pag-serbisyo isip konsihal.

Samtang si Super Gerry Auxillo, magpa-re-elect sa pagkakonsihal sa Barangay Quiot. Naka-serbisyo na si Super Gerry og usa ka termino ug daghan usab siya og natampu labi pa sa pagpanday og mga balaod kay usa man ka barrister si Super Gerry.

Si Jeffrey “Super Jepoy” Tumulak mobalik usab sa pagka-konsihal sa Barangay Camputhaw. Samtang si Papa Joe sa DYRT- barangay FM (99.5) kinsa mohatag usab sa iyang advise dinhi sa Superbalita Cebu, manimpalad usab sa pagka-konsihal sa iyang pinalanggang Barangay Guadalupe. Isuwat lang sa balota ang “Papa Joe” kay taas nang iyang ngalan nga Norinito Pelomiana.

(bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph