ANGAY bang ipadayon ang Bus Rapid Transit o kanselahon? Mao ni ang gidebatihan ug hukman sa umaabot nga mga adlaw sa nasudnong kagamhanan.
Naduhigan na og pulitika ang isyu tungod kay managkaatbang nga kampo sila si Cebu City Mayor Tomas Osmeña ug Presidential Assistant for the Visayas Michael Dino bisan kon si Dino di modagan og bisan unsa nga posisyon.
Kining isyu sa BRT di unta moabot ning punto sa panaglalis kon gipaspasan pa ang pagpatuman niini. Apan tungod sa kahinay sa pag-aksyon sa kagamhanan, ingon sa naunhan sa paspas nga kalamboan sa karsada ang mao nga proyekto.
Pabor ang business sector sa pagpadayon sa BRT basta palapdan ang karsada. Naa hinuon sa iyang feasibility study ang mga dapit nga angay palapdan ug ang mga kahoy nga maapektuhan sa proyekto. Busa, palapdan man kaha diay ang mga dan, di angay kabalak-an nga gamay na lang ang maagian sa ubang mga sakyanan.
Ang BRT ug Light Rail Transit pulos mga solusyon sa trapiko dinhi sa Cebu City. Mas taas ang LRT base sa plano kay ang tanang siyudad ug mga lungsod sa Metro Cebu, agian man niini.
Bitaw, kining duha ka mga proyekto di man unta magsapaway ug usa ra ang tumong--pagpaminos sa kahuot sa trapiko.
Hinaut pa nga undangan ang debate ug pamulitika sa duha ka mga kampo.
Kon unsay resulta sa evaluation sa technical consultant, angay nang respetuhan. Kon mogawas nga angay ipadayon ang BRT, apan dunay gikinahanglang mga kausaban, hinaut nga tahuron sa pikas kampo.
Kon kini pugngan ug di ipadayon, tahuron usab unta sa laing kampo. Apan hinaut nga maleksyon ang kagamhanan ning lakat sa BRT nga ang paglangaylangay sa usa ka proyekto, mao diay ang numero unong makapatay niini.