NIADTONG mga taknaa nabati sab nako kung unsa ang bation sa mga overseas Filipino workers (OFWs) sa higayon nga hagkan, gakson ug gunitan ang kamot sa ilang mga minahal sa kinabuhi nga mabilin diha sa ganghaan sa departure area sa airport.
Kagahapong adlawa gipahiluna nako akong kaugalingon aron ilulinghayaw sa nasud Malaysia uban sa akong mga higala sa RDL Pharmaceutical Laboratory Incorporated.
Ang among kadasig pagsulod sa entrance sa Francisco Bangoy International Airport mao sab ang katugbang sa mga luha nga akong nasud-ongan sa usa ka inahan nga perting gakos sa iyang upat ka mga anak, ang kamaguwangan mora'g anaa sa 12-anyos samtang ang kamanghuran mora'g 5-anyos.
Didto perti nakong paniid kay daw gipugngan gayod sa inahan nga di katulo ang iyang mga luha, apan nakahilak gayod siya human duha sa iyang mga anak ang nanghilak, ug ang kamanghuran gialam-alaman na lang sa iyang bana.
Human niyang panamilit sa iyang mga anak, nagpamahid siya sa iyang mga luha, ug nauna siya'g sud namo sa airport, mga duha ka tawo ang mipatunga sa among pagsunod sa linya ug sa pag-abot sa sulod, gitaparan ko gyod siya og lingkod sa lingkuranan samtang naghulat sa linya nga maablihan sa among flight.
Siya si Marichu Del Carmen, 46-anyos taga Panabo City, kinsa unang higayon niyang manimpalad sa abroad. Wa ko magdahom nga mag-uban diay mi sa usa ka flight. Padung siya sa Hongkong diin connecting flight siya sa among naugan sa Kuala Lumpur sa Malaysia.
Didto samtang naghulat kami nga ablihan ang among pagpa-check in, iyang gisaysay nako ang tanan kung unsa kasakit sa dughan ug kapait alang sa usa ka inahan nga iyang biyaan ang iyang mga anak.
Daw natandog sab ko gumikan ang asawa sa akong uyoan, tua sab nanimpalad sa tunga-tungang sidlakan sa kalibutan ug gani, gamay pa ang ilang bugtong anak nga babaye, mibiya na siya, ug karong 21-anyos na, miapas na sab kini kaniya ug nanimpalad.
Nahinumdom hinuon ko sa The Flor Contemplacion Story niadtong 1995 sa Viva Films nga mikumot sa dughan ug mipaluha sa tanang Pilipino. Istorya sa usa ka Filipina nga domestic helper sa nasud Singapore kinsa nahukman og bitay sa kamatayon sa anak sa agalon sa iyang higala nga si Delia Maga.
Sa paglupad na sa eroplano, sa pagbiya namo sa Davao City, nakahinuktok ko ug nagtan-aw sa mga panganod ug naghunahuna nga sa ka sayon lang ingnon sa mga nabilin sa Pinas nga hayahay sila kay dunay mi-abroad.
Gasto diri, gasto didto, pero wa diay kita masayod nga luyo sa atong pagpahayay ngari sa Pinas, pait diay kaayo ang pagpangita nila og kuwarta sa abroad nga kinahanglan unta gamiton sa pagpapundar sa balay aron pag-uli dunay makita nga bunga sa hinagoan.
Kining tanan subay sa mga pagsaysay sa mga Kababayan natong naa sa abroad, ug napamatud-an ko kini dihang duna koy mga naistorya nga mga OFW nga nanuroy sa Kababayan Park sa Singapore.
Gani, kagahapon akong nakita ang diyutay nga kalipay sa ilang mga dagway diin sa ilang rest day diha silang tanan magtapok, magpaambitay sa mga kaagi sa Pinas ug usahay luyo sa pagpangatawa, mas mopatigbabaw gayod ang mga takna nga makapatulo sila sa ilang mga luha.
Busa kung duna kita'y miyembro sa pamilya nga mi-abroad, di gyod nato usikan ang bunga sa ilang mga hinagoan, inay ibutang nato sa tama nga pamaagi aron sa ilang pag-uli mahupay ang ilang mga kahago, gumikan usa lamang baya ang ilang tumong ug tuyo niining tanan, -- ang mapa-eskuwela kitang mga anak ug mabutang sa maayo ang kahimtang sa pamuyo.
Sa sunod Biyernes, mga higala, atangi ang akong dugang mga pag-asoy diha kaninyo sa akong lima ka adlaw nga laag sa nasud Malaysia ug Singapore.