BANSALAN, Davao del Sur - Gipailawom sa peace covenant signing ug briefing sa Commission on Elections (Comelec) sa lungsod niadtong Miyerkules ang mga kandidato sa Barangay ug Sangguniang Kabataan (SK) alang sa piliay sa Mayo 14.
Sumala ni Abogada Reyn Joy Bullecer, election supervisor, nga angayang mahatagan og impormasyon ang mga kandidato kon unsa ang mga angayang buhaton sa pagsugod sa kampanya ug kon asa mahimong ipapilit ang ilang mga campaign materials.
Hugot sab nga gipahimangnoan ni Bullecer ang mga kandidato nga mosang-at gyud sa ilang Statement of Assets and Expenditures (SOCE) aron di ma-diskuwalipika ang mga modaug ug subling makadagan ang mga maparot.
Mihatag sab og lecture ang kapulisan, kinsa nagbahad nga dakpon gyud ang mga kandidatong molapas sa liquor ban sa bisperas sa eleksiyon.
Sumala ni Chief Inspector Rodante Varona, hepe sa kapulisan, nga usa ka kandidato sa SK ang ilang nasampolan human nasikop sa paglapas sa curfew hours sa pagtagay og ilimnong makahubog sa lugar.
Samtang, si 1st Lieutenant Carlo Garcia, commanding officer sa Alpha Company sa 39th Infantry Battalion (IB), nag-awhag sa mga kandidato nga motaho kanila kon pangayoan og revolutionary tax sa mga komunistang New People's Army (NPA) bugti sa pagsud sa ilang mga balwarte.
Giangkon ni Garcia nga nakadawat na sila og mga impormasyon nga nangilkil og tag P5 mil ang mga komunista ngadto sa mga kandidato sa pipila ka mga dapit sa Davao del Sur.
Mitambong sab sa tigum ang kura paruko sa lungsod nga si Fr. Rex Tapales, kinsa nagpasidaan nga likayan sa mga kandidato ang pagpangdaut sa ilang mga kaatbang ug bugtong plataporma lamang ang angayang iyagyag sa katawhan pagsugod sa kampanya sa Mayo 4.