ANG Bureau of Customs (BOC) mopasaka og kaso batok sa tag-iya sa tindahan diin ang gibana-bana nga P60 milyones nga inismagol nga beauty and skin care products nasakmit.
Sa press conference kagahapon, si Customs Commissioner Isidro Lapeña nagkanayon nga ang Customs police mironda sa tulo ka mga tindahan nga namaligya ug nagpundo og mga peke nga cosmetic products niadtong Biyernes Abril 20.
Kini nga mga tindahan nahimutang sa dalang Ramon Magsaysay ug Lizada ning siyudad.
Ang Customs mopasaka og kaso sa tag-iya tungod sa kapakyas sa pagbayad sa buhis niini nga nakalapas sa Section 117 ug 118 paragraph (e) ug (f) sa Customs Modernization and Tariff Act, ug lain pang balaod, lakip na Intellectual Property Code, ug Food and Drug Administration Act.
Si Lapeña nagkanayon nga nangalap sila og ebidensya ug sila padayon nga naglusad og imbestigasyon.
Sa bisan unsang oras, sila mopasaka og kaso batok sa mga tag-iya sa tindahan.
Dihang gipangutana kung paunsa kining peke nga produkto nakalusot sa BOC, si Lapeña nagkanayon, “[These are] misdeclared and undervalued and with the volume of container vans that go through the Customs on a daily basis, hindi na-iinspect lahat yan. For example, ide-declare nila itong mga ganitong products, and then pag-view [sa x-ray machine] is similar. It cannot be determined outright there na ito pala ay mga counterfeit products. So nakakalusot.”
Si Lapeña nagsulti nga siya miapruba sa letters of authority nga ipresenta ngadto sa tag-iya nga maglusad og inspeksyon human ilang opisina nakadawat og reklamo gikan sa manufacturer sa original brands tungod sa pagkopya sa ilang produkto.
Dunay upat ka mga Warrants of Seizure and Detention nga gipaguwa ni Acting District Collector Lawyer Romalino Valdez.
Ang peke nga produkto gikompiska sa BOC dihang ang tag-iya sa tindahan napakyas sa pagpakita sa pruweba sa pagbayad sa buhis.
Human ang opersyon, ang tindahan gisirhan sa BOC.