SEGURADONG daghang taga dakbayan sa Lapulapu ang makahigayon pagtan-aw sa Kadaugan sa Mactan kay pista opisyal sa dakbayan. Madugangan sa mga trabahante ang nagbakasyon nang daan nga mga estudyante.
Sama sa nangaging katuigan, daghan usab nga taga laing lugar ang modugok sa kalihukan tungod sa lainlaing hinungdan: motan-aw sa mga artista, makig-bonding sa mga higala, moapil sa mga kalihukan ug mangusyoso lang.
Sa ako nang nahisgutan sa una, si Derrick Hidalgo ang modala sa papel ni Lapulapu, si Adrian Luis Alandy ang Magellan ug ang Cebuanang si Dionne Monsanto ang Rayna Bulakna.
Giingong lahi ang pagpasundayag karong tuiga kay gihimo kining musical. Naglungotlungot kong motan-aw kon makahigayon.
Gusto sab nakong masaksihan ang Rampada karong tuiga aron masuta kon may mga kausaban ug kalambuan ba sa pagpahigayon niini. Mga pahalipay sa mga opisyales sa dakbayan sa Lapulapu ug sa ubang mga tigpasiugda sa kasaulogan.
Ipahigayon usab karong adlawa ang press conference alang sa pagpangita sa Binibining Cebu 2018. Ang bangga sa kaanyag gipasiugdahan sa Bb. Sugbu Charity Foundation Inc. ug sa Sacred Heart School for Boys Batch 1985 Foundation Inc.
Kahinumdoman nga ang kandidata sa Badian nga si Apriele Smith ang nakoronahan isip unang Bb. Cebu sa niaging tuig. Kinsa ug taga diin kaha ang mopuli sa iyang trono?
Gipaila-ila na sab diay ang mga kandidata sa pagka Ms. Mandaue 2018. Sa Mayo 6 himoon ang koronasyon. Nagkakita mi ni Mayor Luigi Quisumbing sa pagbisita niya sa Oslob niadtong pagpahigayon sa Capability Demonstration nga gipasiugdahan sa Phil. Navy. Navy Reservist si Mayor Quisumbing.
Nagkaila mi ni Mayor niadtong Board Member pa siya ug pirme kong mobisita sa iyang opisina isip sakop sa Prov’l. Information Office. Akong gikomedyahan si Mayor Luigi nga mamista ko pohon sa Mandaue.
Niyango si Mayor uban sa iyang trademark nga pahiyom. Motunga gyud ko, Mayor.
Mao pa gani kunoy pagbalik sa ABS-CBN ug Star Cinema, nangaway na dayon si Kris Aquino kang Korina Sanchez-Roxas. Kon pautot ba kadto ni Kris o natural lang nga reaksyon kalabot sa isyu sa iya kanhing bana nga si James Yap, sa minahal niini karon nga si Michela Cazzola nga nigawas sa programa ni Korina, ug sa anak nila ni Kris ug James nga si Bimby, kang Kris ra sab to. Nakadayeg lang ko ni Korina nga nipili sa pagpakahilom na lang.
Tungod kay init pa kaayo ipadayon pag-adto sa akong mga tuyo adtong Lunes sa udto, nakahukom ko nga magpalabay sa panahon sulod sa sinehan sa Ayala Center. Nagbitbit na ko sa tiket dihang nabantayan nako nga diha pa sa akong kamot ang kwarta nga igbabayad. Nibalik ko sa nagbaligya sa tiket aron mobayad.
Bantog rang wa ko paningli kay di gyud diay pabayron ang mga seniors basta unang salida sa adlawng Lunes. Nakahinumdom ko nga naka-avail na ko ani pero niadtong Pebrero pa tingali to mao nga nakalimot ko (senior na god).
Nganong molimod pa man gyud ko nga di man malalis? Gawas pa, daghang benepisyo ang gihatag sa mga seniors nga igo rang maglaway ang mga batan-on. Sige lang, moabot ra ang inyong panahon.
Naintriga ko sa istorya sa Da One That Ghost Away ug kon unsaon ni Kim Chiu paghatag og kinabuhi ang iyang papel isip tig-palayas sa mga dautang ispiritu.
Mao nga sa lima ka mga pelikula, ang Dotga ang akong gipili. Nalingaw ko. Nilambo na gyud ang abilidad ni Kim isip artista kay kaya ra niyang magdrama ug magkiningkoy.