ALAS 6 karong buntag ipatuman ang road closure sa Punta Engaño Road, Barangay Mactan, Lapu-Lapu City nga manukad sa eskina nga bahin sa Mactan-Maribago road paingon sa eskina sa Angasil access road.
Kini gumikan sa ipahigayon nga re-enactment sa Kadaugan sa Mactan sa Liberty Shrine, Barangay Mactan nga sugdan sa alas 7 sa buntag pinaagi sa usa ka santos nga misa.
Sa kadtong manukad sa Barangay Punta Engaño paingon sa city proper gikihanglang nga mosubay sa Angasil access road subay Mactan Newtown Boulevard gawas sa M.L. Quezon Highway.
Ingon man niadtong nanukad sa M.L. Quezon highway paingon habig sa Punta Engaño mosubay sa Newtown boulevard lagbas sa Angasil access road.
Ang deputy sa City Traffic Management System (CTMS) Roderick Daño nagkanayon nga labing taas na ang upat ka oras pagsira sa karsada.
“Right after mahuman ang re-enactment sa Kadaugan, abli (Punta Engaño road) na dayon mi,” pasabot ni Daño sa Superbalita Cebu.
Si Presidential Assistant for the Visayas Michael Dino maoy magsilbing keynote speaker sa ika-498th celebration sa kasaysayan diin napukan ni Datu Lapu-Lapu si Ferdinand Magellan.
Samtang ang OIC sa Pagasa Visayas Oscar Tabada mipahinumdum sa publiko ilabi na niadtong mosaksi sa re-enactment sa Kadaugan sa Mactan nga magsul-ob og komportable nga sapot ingon man ang paggamit og kawo o payong panagang sa naglagiting nga init sa adlaw.
Gibana-bana nga adunay 33–36 degrees Celsius ang kainiton apan sa hapon ngadto na sa kagabhion adunay pag uwan-uwan gumikan sa localized thunderstorm. (FVQ)