KASO sa carnapping sa dakbayan sa Mandaue sa unang quarter ning tuiga nitaas kompara sa milabayng tuig.
Kini base sa rekord nga natala sa Investigative and Detective Management Branch (IDMB) sa Mandaue City Police Office (MCPO).
Base na talaan sa IDMB, gikan sa 17 ka mga kaso sa unang kwarter sa milabayng tuig, nahimo na kining 29 karong tuiga.
Sa 29 ka mga kaso, 11 pa lang niini ang nasolbar na sa kapulisan, sumala ni P/CInsp. Mercy Villaro, information officer sa MCPO.
Mga motor sab ang sagad mabiktima sa karnap. Gani, ning tuiga, duha lang ka mga four-wheeled vehicle ang na-carnap.
Paambit ni Villaro sa Superbalita Cebu nga pipila sa mga rason nga nitaas ang kaso sa pagpangawat og motor mao nga dali makopya ang yawi ug dali ra kini maliso.
Sagad sab nga mabiktimang sakyanan anaa nag-urong sa kilid sa dan ug wa nagparking sa mga designated parking areas.
Sa pagkakaron, gitino sa kapulisan sa dakbayan kon adunay koneksyon ang mga suspek nga nalambigit sa krimen.
Kagahapon sa buntag, ang Regional Highway Patrol Group 7 nihimo og orientation sa mga operatiba, imbestigador, mobile patrol ug traffic personnel sa MCPO kalabot sa nagkadaiyang modus sa pagpangarnap. (JPP)