SECTIONS
Monday , May 21, 2018
SUPERBALITA CEBU

Nahan-ay na ang sa Cebu Business Month

NAHAN-AY na ang nagkadaiyang kalihokan alang sa umaabot nga kasaulogan sa Cebu Chamber of Commerce and Industry Inc. (CCCI) sa Cebu Business Month sa Hunyo.

Ang mga kalihokan gidesinyo aron pag-highlight sa kamahinungdanon sa innovation sa tanang aspeto sa patigayon.

Ang tema sa kasaulogan sa CBM karong tuiga mao ang “Innovate Cebu!” nga ang mga kalihokan motutok sa turismo, entrepreneurship, ug information and communications technology ug business processing management (ICT-BPM).

Si Benedict Que, overall chairman sa CBM 2018, namahayag nga ang katuyoan sa CBM mao ang pagdasig, pag-promote ug pagtabang nga mapalambo ang sektor sa negosyo sa Sugbo.

Iyang giklaro nga ang CBM alang usab sa Small Medium Micro Enterprise (SMMEs) sukwahi sa pagtan-aw sa uban nga alang lang kini sa mga adunahan.

“We would like to help those SMMEs and Start-up to flourish also their business,” dugang ni Que, kinsa presidente usab sa Golden Prince Hotel & Suites.

Ang usa ka buwan nga selebrasyon magsugod sa Hunyo 1 pinaagi sa engrande nga opening salvo nga magpakita sa world-class nga mga pasundayag sa Ayala Terraces diin makita usab ang lainlaing mga klase sa produkto sa kalungsuran ug mga siyudad pinaagi sa One Town, One Product (OTOP) ug Start-ups Exhibit nga magdasig sa lokal nga mga negosyo nga molambo.

Samtang sa Hunyo 10 hangtod sa 12 mao ang ikaduhang Lumba’g Laag Sa Sugbo nga magdala sa 28 ka mga team sa lainlaing nakatago nga mga atraksyon sa habagatan ug tungatungang-kasadpang bahin sa lalawigan sa Sugbo.

Human niini, isunod ang Tourism Innovation Forum sa Hunyo 14 diin hisgotan sa mga stakeholder ang bag-ong mga ideya alang sa pagdani og dugang mga turista sa Sugbo.

Apil sa mga mamumulong si Tourism Secretary Wanda Corazon Teo, Enchanted Kingdom Chairman ug CEO Cesar Mario Mamon, Golden Phoenix Hotels Director Sales Christine Ann Ibarreta, EON Chairman ug CEO Teodoro Del Mundo Jr., Saceos Singapore Meetings, Incentive, Congress, Exhibitions and Events Association President Janet Tan-Collis, ug uban pa.

Sa Hunyo 19 ug 20, mao ang main highlight sa CBM 2018, ang Innovation Summit sa Waterfront Cebu City Hotel & Casino. (SCG)


VIEW COMMENTS