ANDAM na sa pag publikar ang Philippine Drug Enforcement Agency (PDEA) 7 sa mga ngalan sa narco politicians sa Central Visayas nga nalakip sa listahan ni President Rodrigo Duterte, apan sa di pa ipahibawo sa publiko kon wa pay kasong kriminal ug administratiba nga ipasaka batok kanila.
Wa pa masayod ang PDEA 7 kon pila ka mga barangay officials sa Sugbo ang nalakip sa listahan nga nalambigit sa illegal nga drugas nga gitakdang ipublikar sa mosunod nga mga adlaw.
Si PDEA-7 Director Emerson Margate nagkanayon nga ila pang gipaabot ang mando sa ilang ulohang buhatan kon kinsa ang mopagawas sa mga ngalan.
Apan iyang gisiguro nga di basta-basta ang pag publikar sa maong mga ngalan sanglit pasakaan una kini og kasong kriminal ug administratiba sa Department of Interior and Local Government sa di pa ipagawas sa publiko. Gipasabot ni Margate nga ang 289 ka mga narco politicians nga naa sa PDEA list gipaubos na sa validation ug nasuta nga kini nalambigit sa illegal nga drugas. Si Gobernador Hilario Davide III, sa iyang bahin, niingon nga supak siya sa pagpublikar sa mga ngalan sa narco list. Apan mopaluyo siya niini kon idungan usab ang pagpasaka og pormal nga reklamo batok sa hingtungdang mga indibidwal. (AYB, AZDL)