SECTIONS
Monday , May 21, 2018
SUPERBALITA CEBU

Ginang ‘nakailad og P60M’

‘Investment scam’. Si Maria Victoria Torralba, 36, taga Barangay West Poblacion, siyudad sa Naga, nasikop kagahapon sa Barangay Kasambagan, syudad sa Sugbo sa kasong estafa ug syndicated estafa. Gibana-banang P60 million ang iyang nakuhang kwarta gikan sa mga biktima, apan siya nihimakak. (Arnold Y. Bustamante)

BABAYE nga dunay kapin sa 30 ka mga kasong estafa ug syndicated estafa nasikop sa Regional Special Operations Group 7 pinasikad sa warrant of arrest nga giisyo sa daghang mga korte sa Siyudad sa Sugbo human makadispalko og kapin sa P60 million sa iyang gipang-ilad aron mo invest sa iyang negusyo.

Apan gihimakak kini ni Maria Victoria Torralba, 36, kay matod niya, mokabat lang sa P6 million ngadto sa P10 million ang iyang nadispalko.

Nasikop si Torralba, taga sitio Happy Valley, Barangay West Poblacion, siyudad sa Naga kagahapon sa Barangay Kasambagan, syudad sa Sugbo.

Ang giingong modus ni Torralba mao ang paghaylo sa mga gustong mo invest nga mobubo og puhonan, diin matag buwan mokita og 20 percent sa ilang capital nga gideposito.

Ang maong kwarta gamiton sa pagpalit sa giingong mga sinakong smuggled rice nga nasakmit sa Bureau of Customs nga iya usab nga ibaligya sa dagkong mga tindahan sa Metro Cebu.

Giingong nagpaila usab siya nga kasusyo sa negosyo sa dagkong mga negusyanteng Insik ug uban pang mga dagkong ngalan sa Sugbo.

Usa sa mga nabiktima nga nagpaila lang sa ngan nga Nilda, taga syudad sa Lapu-Lapu, nitug-an nga aduna siyay higala nga nag post sa Facebook nga nagpakita sa mga sinakong bugas humay.

Sa dihang iyang gipangutana unsaon niya nga makaangkon usab niini, gihaylo siya nga moapil sa investment nga gipadagan usab sa kaila niini diin ang ibubu nga puhonan moginansya og 20 porsiento matag buwan.

Tungod sa pasalig, ang iyang tinigom sa pagtrabaho sa nasud sa Japan nga mokabat sa P50,000 iyang gi down.

Sa unang mga buwan, nakadawat na dayon siya sa 20 percent nga gisaad ni Torralba.

Tungod sa pagsalig ug pagtuo nga tinuod ang maong negusyo, nidugang pa siya og hatag aron mosaka pa ang iyang kwarta hangtod sa kapin sa P100,000.

Apan natingala nalang siya nga wala na kini mohatag sa tubo sa iyang kwarta lakip na ang usa ka sakong bugas.

Dinhi na siya nabalaka nga ilad ang iyang nasudlan nga negosyo.

“Mga three times ra gyud mi nakadawat. After that, puro promise nalang iyang giingon namo nga ang nahitabo sa among business nga wala pa daw mobayad ang tindahan. Daghan na siyag alibi,” asoy ni Nilda.

Mikiha

Tungod niini, nipasaka na siya og kaso sa korte ug dinhi nasayran ni Nilda nga di lang siya ang nabiktima.

Moabot ngadto sa kapin P60 million ang bana-bana sa kapulisan ug sa mga biktima nga nakuha nga kwarta ni Torralba sa mga tawo nga ning-investment ug bisan usa ka dako walay mibalik kanila.

Kasagaran sa mga nabiktima mao ang grupo sa mga magtutudlo, mga engineer, mga overseas Filipino workers (OFW) ug mga asawa og langyaw nga gustong motubo ang ilang kwarta.

Gihimakak ni Torralba nga nangilad siya sa mga ningbubo og puhonan sa iyang negosyo sanglit tinuod kini.

Apan nalugi lang siya human nahagba ang iyang gisudlan nga investment dungan sa saad nga iyang iuli ang kwarta nga iyang na dispalko.

Nangayo usab siyag pasaylo sa mga tawo nga nawagtangan og dagkong kantidad.

“Wala ko mangilad. Actually part sya sa business nga nag invest. Naa mi kontrata nga naka-bind sya nga naka state sa among kontrata is just una, nakabayad ko, nakahatag ko sa profit. Naabot lang gyud sa time nga napurdoy ko kay na invest nako sa lain nga wala ko bayri. Willing ko mo settle sa akong obligation,” matod ni Torralba.

Matod pa, aduna siyay gisudlan nga negosyo sa construction ug pagpamaligya og bugas apan wa masugakod tungod kay giutang usab ang iyang puhonan.


VIEW COMMENTS