NAGPAULBO og three-point bomb si LeBron “King” James atol sa pagtingog sa final buzzer aron agakon ang hosts Cleveland Cavaliers sa 98-95 nga kadaugan batok sa Indiana Pacers sa Game 5 nga naghatag sa Cavaliers og 3-2 nga bintaha sa 1st round playoffs series sa National Basketball Association (NBA) kagahapon.
Sa wala pa ang iyang nakapadaog nga opensa, si James mitrabaho una sa depensa diin iyang gipalakan ang layup ni Victor Olapido sa nahabiling 3.3 segundos nga posible untang makapadaog sa Pacers. Niadtong higayuna, nagtabla ang duwa, 95-95.
Human niini, nadawat ni James ang bola gikan sa inbound pass ni JR Smith unya mi-dribble kini’g kaduha dayong itsa sa nakapadaog nga tres atubangan sa depensa ni Thaddeus Young.
Sa pag-ulbo sa abiba sa mga dumadapig sa Cavaliers, si James migakos sa iyang rookie nga kauban nga si Cedi Osman dayon mipatong sa scorer’s table aron magsaulog.
“As a kid you always have those 3, 2, 1 moments and that’s what it kind of felt like,” matod ni James.
“I felt like I was a kid all over again playing basketball at my house on makeshift hoops and my socks as a basketball.”
Si James, kinsa four-time MVP, nipakatap og 44 puntos ug 10 rebounds unya perpekto kini sa iyang 15 ka freethrows aron pangulohan ang kadaugan.
“He does it at both ends every single night,” asoy ni Cavs forward Kevin Love kabahin kang James.
“That’s why he’s the best player in the world.”
Ang Pacers mingkuwestiyon sa krusyal nga pagpalak ni James kang Olapido. Alang sa Pacers, angayan kining tawagan og goaltending.
Sa replay sa telebisyon, makita nga nibanda ang bola sa board una kini napalakan ni James.
“I got a step on him and I felt I even got grabbed,” asoy ni Oladipo. “It hit the backboard and he blocked it. It was a goaltend. It’s hard to even speak on it. That layup is huge.”
Igo lang mipahiyom si James dihang gipangutana kabahin niini.
“Of course I didn’t think it was a goaltend,” matod ni James.
“I try to make plays like that all the time. He made a heck of a move, got me leaning right and he went left and I just tried to use my recovery speed and get back up there and make a play on the ball.”
Sa Houston, hingpit nang gitaktak sa hosts Rockets ang Minnesota Timberwolves pinaagi sa 122-104 nga kadaugan sa Game 5 nga maoy nagtiklop sa ilang kaugalingong 1st round series, 4-1.
Sa 2nd round, ang Rockets maghuwat na lang sa modaog sa laing 1st round series tali sa Utah Jazz ug Oklahoma City Thunder nga nagkombati sab kagahapon.
Ang hosts Thunder nakabaton pa’g laing kahigayunan human nila gipangpukan ang Jazz, 107-99, sa Game 5. Naglabaw lang hinuon gihapon ang Jazz ning maong series, 3-2.
Samtang sa Toronto, ang Raptors mingkitkit sa Washington Wizards, 108-98, aron pagposte og 3-2 nga bintaha sa ilaha sab nga series.
Gipangulohan ni DeMar DeRozan ang Raptors pinaagi sa iyang 32 puntos ang iyang partner nga si Kyle Lowry niamot og 17 puntos. (AP, ESL)