NINDOT ang nahimong bag-ong katikaran karon sa relasyon tali sa South Korea ug North Korea.
Kagahapon sa buntag giatngan sa tibuok kalibutan ang himuong panagtigum sa duha ka mga lider sa duha ka nasud.
Gikonsidera man god kini nga maoy pinakaunang higayon nga magkahimamat ug magkaatubang ang mga lider sa duha ka nasud nga sila si North Korea lider Kim Jong-un ug South Korea lider Moon Jae-in.
Nasayran nga ang katapusan nga dunay nahitabong panagtigum sa duha ka nasud niadto pang 1950.
Gitakda kagahapon nga magtagbo sila sa demilitarized zone (DMZ) alas 8 sa buntag (oras dinhi sa Pilipinas).
Pipila sa mga hisgutan sa duruha ka lider mao ang denuclearization sa Korean peninsula, peace settlement ug ang paghapsay sa relasyon sa North ug South Korea.
Sayo niini, gipamahayag sa North Korea nga ila nang tapuson ang paggama og mga nuclear weapons ug undangon na nila ang paglunsad niini.
Milaum sab ang daghang mga world liders nga mahimong malampuson ang panag-istorya sa duha ka lider aron nga hingpit nang maangkon ang kalinaw sa Korean peninsula.
Kahinumdoman nga natunga ang duha ka nasud tungod sa managlahi nga idolohiya human ang Ikaduhang Giyera sa Kalibutan.
Usa ka kapitalistang demokrasiya nga liberal karon ang South Korea, nga gisuportahan sa Estados Unidos. Samtang nagpabilin nga komunistang Estado ang North Korea, gisuportahan sa Unyong Sobyet.
Kon unsa man ang nag-aghat sa duruha ka nasud aron nga lig-unon ang ilang relasyon, taliwala sa managlahi nilang mga idolohiya, molaum sab kita alang sa malampuson nilang panagsabot nga mahimo unyang sumbanan sa uban pang mga nasud sa kalibutan nga nagkasungi nga mag-uliay sa maayong kabubut-on alang sa kaayohan sa tagsa-tagsa nila ka mga katawhan.