SECTIONS
Thursday , April 26, 2018

Dalaw gisuspenso

GISUSPENSO ni Gobernador Hilario Davide III ang dalaw alang sa mga piniriso sa duha ka mga selda sa Cebu Provincial Detention and Rehabilitation Center (CPDRC) diin makuha ang duha ka medium-sized nga pakite sa gituohang shabu atol sa greyhound operation niadtong Huwebes.

Si Bobby Legaspi, pangu sa Civil Security Unit sa Kapitolyo ug miyembro sa CPDRC Task Force, nibutyag nga di mominos 60 ka mga bilanggo ang maapektuhan sa pagkasuspenso sa dalaw sugod kagahapon.

Matod niya madungagan ang ihap mag-agad sa gidak-on sa mga selda nga dunay normal nga kapasidad nga 19 ngadto sa 32 ka mga bilanggo ang masud, diin ang uban anha na mangatulog sa mga duyan sa hallway.

Si Legaspi nipasidaan nga sa higayon dunay laing mga kontrabando ang makuha ang tanang mga bilanggo na ang temporaryo nga did-an sa pagdawat og mga dalaw.
Atol sa greyhound operation, ang duha ka mga pakite sa gituohang shabu giingong nakuha gikan sa mga higdaanan nila ni Jerryfer Peregrino ug Russel Calida sa mga selda 26 ug 98.

Ang duha pulos nag-atubang og mga kaso may kalambigitan sa gidili nga drugas.

Ang nasakmit nga gituohang gidili nga drugas motimbang og 6 gramos ug nagbalor og P71,980 base sa Dangerous Drugs Board value. (SCG)


VIEW COMMENTS