ATUBANGAN sa mga Sugboanon, gipirmahan na ni Presidente Rodrigo Duterte kagahapon ang executive order nga nagdili sa bisan unsa nga matang sa contractualization dinhi sa nasod.
Apan iya usab nga giawhag ang Kongreso sa pagpanday ug pagpalabang og balaudnon nga mag-usab sa iyang gihulagway nga karaang Labor Code sa nasod.
“I remain firm in my commitment to put an end to endo and illegal contractualization. However, I believe that in order to implement an effective and lasting solution to the problems brought about by contractualization, Congress needs to enact a law amending the Labor Code,” nagkanayon si Duterte.
Ang Articles 106 ngadto sa 109 sa Presidential Decree 442 kun Labor Code of the Philippines nagtugot sa mga kompaniya sa pagsulod og contractual arrangements tali sa mga kawani.
Si Duterte, kinsa mao ang dinapit sa ika-116 ka tuig nga selebrasyon sa Labor Day sa IC3 Convention Center sa Pope John Paull II, Mabolo, Cebu City nipirma sa maong EO atubangan sa mga Sugboanon nga nitambong sa maong kalihokan.
Apan giklaro ni Duterte nga mao ra kini ang iyang mabuhat isip usa ka pangulo sa nasod ug anaa gihapon magpabilin sa mga magbabalaod ang pag-usab sa kasamtangang balaod.
“Dugay na ni. It’s outdated. I think Congress should come up with a new Labor Code to keep it attuned (to) realities of our times,” dugang ni Duterte.
Ang EO nagkanayon nga kon gihimo ang contracting ug subcontracting nga magtikas sa katungod sa seguridad sa pangempleyo, pag-organisar ug pagsulod og collective bargaining agreement pinasubay sa 1987 Philippine Constitution, kini gidili.
Dugang sa Presidente nga igo lang siya nga nipatuman sa balaod ug di kini husto alang sa long-term nga solusyon sa giatubang nga problema sa kontraktualisasyon.
Gimandoan ni Duterte ang Department of Labor and Employment (Dole) sa paghatag kaniya og listahan sa mga kompaniyang nisulod og labor contracting.
Apan giklaro ni Labor Secretary Silvestre Bello III nga usa lang ka regulation sa contractualization ang maong EO.
Dugang niya nga i-regulate lang ang contractualization ug aduna’y pipila ka mga trabaho nga mamahimo gihapon nga kontrata lang.
“Yung pwedeng i-outsource kagaya halimbawa nung seasonal, yung project-based, yung security (guards), janitors, maintenance, ganun,” pasabot ni Bello.
Giklaro usab niya nga kining gibuhat karon sa mga kompaniya nga endo, kalapasan sa balaod ug mamahimo nga mapahamtangan og silot.
“To all non-compliant and abusive employers who are engaged in labor-contracting, your days are numbered,” bahad ni Duterte. “I will see to it that our laws are strictly enforced. The government will not rest until we end the shameful labor practice,” nagkanayon ang Presidente.
Ang kalihokan kagahapon gidungan sa mga jobs fair sa nasod diin sa IEC Pavillion gipahigayonan sa Sugbo kagahapon.
Lakip sa nitambong kuyog ni Duterte si kanhi presidente Gloria Macapagal Arroyo, Assistant for the Visayas Michael Dino, Bello, Foreign Affairs Secretary Alan Peter Cayetano ug uban pa.
Atol usab sa speech ni Duterte nasigpatan sa Superbalita Cebu si Cebu City Mayor Tomas Osmeña nga niabot sa venue apan anaa ra sa kilid nga nilingkod. (dugang taho sa Sunnex)