Barrita: ‘Endo’ undang na?

GIPIRMAHAN ni Presidente Rodrigo Duterte niadtong Martes sa buntag, May 1, atol sa ika-116 nga kasaulogan sa Labor Day, ang usa ka executive order (EO) nga magpaundang sa labor contracting atubangan sa libo ka libong mga aplikante og trabaho didto sa IEC Pavilion sa Barangay Mabolo, syudad sa Sugbo.

Si Labor Secretary Silvestre Bello maoy nibasa sa EO, nga magpahunong sa “Endo.” Ang “Endo” kon end of contract, mao ang contractualization scheme, mga kontrata sa mga trabahante sa hamubo nga higayon aron paglikay nga sila mahimong mga permanente o regular nga trabahante.

Apan makapaundang ba ang maong orden ehekutibo sa tanang matang sa “Endo”?

Ang Section 2 sa maong EO nagdili sa “illegal contracting and subcontracting.” Gidili usab sa maong EO ang bisan unsang contracting o subcontracting nga makalapas sa katungod sa mga mamumuo alang sa security of tenure, self-organization, collective bargaining ug uban pang mga malinawong hiniusang kalihokan.

Ang security of tenure mao ang katungod sa mga empleyado nga di mataktak sa trabaho kon way igo ug makatarunganon nga hinungdan ug sa di pagtamod sa procedural due process ubos sa Labor Code.

Ang procedural die process mao ang pagpaminaw sa habig sa usa ka empleyado sa di pa siya hukman ug pahamtangan og silot sama sa pagsuspenso o pagtaktak sa trabaho.

Sa usa ka news briefing niadtong Abril 19, si Bello namahayag nga way dangatan ang usa ka EO sa Edo kon di kini higpit nga ikapatuman tungod kay kinahanglang silotan ang makalapas nga mga kompaniya nga di mahimo sa usa ka EO.

Gusto sa mga pundok sa mga mamumuo nga idili ang tanang matang sa contracting ug subcontracting aron direct hiring na ang mopatigbabaw. Apan si Bello niingon nga di kini mahimo sa gobyerno tungod kay duna pay mga serbisyo nga kinahanglan og mga kontrata sama sa mga security guards ug mga janitorial services.

Ang Presidente niingon nga ang EO di pa igo alang sa pag-undang sa contractualization ug kinahanglan pa nga mopasar ang Kongreso og balaod nga mag-amendar ug magpalig-on sa probisyon sa security of tenure ubos sa Labor Code nga matod pa niya outdated na.

Ang gikabalak-an sa uban mao nga di ba kaha makasamot sa unemployment ang pag-undang sa Endo. Sumala pa sa labing ulahing survey sa Social Weather Stations (SWS) nga gipagawas niadtong Labor Day, adunay 10.9 milyunes ka mga Filipino o 23.9 porsento sa populasyon nga way trabaho. Mokabat sa 7.2 milyunes ka mga Pilipino ang way trabaho nga natala niadtong Disyembre sa tuig 2017. (edbarrita@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph