LAUMAN sa katawhan ang paspas nga pagresponde human na usab nga aduna’y bag-ong gipangtunol nga mga sakyanan alang sa kapulisan nga gikan sa lokal nga panggamhanan.
Pormal nga gitunol ang usa ka Isuzu Max ug tulo ka mga unit sa Toyota Hilux sa pagpangulo na usab ni Mayor Oscar Moreno.
Gibutyag ni Police Superintendent Mardy Hortillosa, tigpamaba sa kapulisan sa Cagayan de Oro City Police Office (Cocpo), nga mas napili ang tulo ka mga estasiyon sa kapulisan nga anaa sa sentro ning dakbayan gumikan na usab kay mas gikinahanglan kini.
“Well kung atong tan-awon, naa man gud sila sa sentro, ang Police Station 1, 3 and 4, kay naa man gud sila sa sentro sa area sa Cagayan de Oro meaning to say nga dapat gyud nga maayo pud ang ilang mobility diri kay of course basta sentro ang hisgutan daghan pud krimen, daghan pud mga respondehan,” pahayag ni Hortillosa.
Saysay usab niini nga ang mga karaan nga mga sakyanan ang ihatag ngadto na sa mga wala gyu’y sakyanan sama na lamang sa Police station 7 (PS7) ug sa Police Station 8 (PS8).
Gidugang pa niini nga mas lauman karon sa katawhan ang paspas nga pagresponde kumpara kaniadto nga wala’y mga tarong nga sakyanan.
“More patrol visibility ug mas dali ang pag responde compare sauna katong mga Police station nato nga walay mga sakyanan mas-paspas ang pagresponde nato,” dugang pa niini.
Apan gipasabot usab niini nga dili usab pasabot nga tanan marespondehan gyud dayon ilabi na usab kung daghan ang magdungan sa pagpangayo og tabang apan nasayod na matud pa ang mga kapolisan sa protocol nga kung kinsa ang mas pinaka importante nga respondehan mao kini ang unahon.