CONSULTANT sa Lapu-Lapu City Government gi-ambush kagahapon sa hapon sa gibana-banang unom ka mga tawo nga riding in tandem sa may Pakpakan Road, Barangay Basak.
Pinusilay naabot sa compound sa Mactan Doctors’ Hospital kay gipalahos sa biktima ang iyang gimaneho nga Nissan Navarra apan gisundan gihapon siya sa mga gunman.
Ang biktima giila nga si Dunide Macasalong Daligdig, 56, minyo, taga-barangay Basak – Iba sa maong dakbayan.
Si Daligdig dunay mga samad sa nawong ug buko-buko.
Base sa inisyal nga kasayuran nga nahipos sa Police Station 4 pinaagi ni P02 Joeramie Espinosa nga ang pagpamusil nahitabo sa mga alas 2:30 sa hapon duol sa rotunda sa Pakpakan road nga pipila lang ka metros gikan sa pribadong tambalanan.
Asoy ni Espinosa nga si Daligdig nagmaneho sa iyang pick-up type truck nga Nissan Navarra nga adunay plate no. OY 1904 nga naggikan sa Basak – Iba paingon sa Barangay Marigondon, gipusil siya sa mga lalake nga luwan sa tulo ka mga motorsiklo.
“Nagsakay (gunman) og duha ka Mio ug usa ka Suzuki nga motor,” paghulagway ni Espinosa sa dihang nahinabi sa Superbalita Cebu.
Bisan kon samaron, nakahigayon pa si Daligdig sa pagmaneho lahos sa ospital.
Sumala pa ni Espinosa nga si Daligdig gibalhin sa tambalanan sa Cebu City.
Sa ilang opisyal nga pamahayag, ang tambalanan nagkanayon nga nakigtambayayong sila sa mga awtoridad.
Matod sa tambalanan nga way bisan usa nga naangol sa hitabo samtang giseguro sa ilang security personnel ang kaluwasan sa tanang mga pasyente ug mga tawo sud sa ospital.
“There was also no major damage of property. We would like to assure the public that everyone, especially our patients, is safe with MactanDoc. Our team have always been working tirelessly to give our patients and their families a safe and secured healing environment. We have heightened our security efforts to prevent similar circumstances from happening again,” matod sa ilang pamahayag. (FVQ)