DAGHANG mga balaod ang mahimong malapas ug nalapas na niadtong mga kandidato nga nangampanya alang sa piniliay sa barangay ug sa Sangguaning Kabataan karong umaabot nga Mayo 14.
Gawas sa mga lagda sa eleksyon, ang Department of Environment and Natural Resources (DENR) 7 nipahimangno sa tanang mga kandidato sa 3,003 ka mga barangay sa Central Visayas batok sa paglansang sa ilang mga campaign materials sa mga kahoy.
Si DENR 7 Regional Director Gilbert C. Gonzales niingon nga ang paglansang sa mga streamers ug mga tarpaulins ngadto sa mga kahoy makadaot sa maong mga kahoy ug mahimong hinungdan sa ilang kamatayon.
Matod pa ni Gonzales, ang Section 3 sa Republic Act No. 3571, nagdili sa pagputol, pagdaot ug pagdagmal sa mga kahoy, mga tanom nga mamuwak ug mga tanom nga giadorno sa mga kadalanang pampubliko, mga plaza, national park, mga eskuylahan ug ubang hawan nga pampubliko.
Ubos sa Section 3 sa Presidential Decree No. 953, ang maong mga kalapasan gipahamtangan sa silot nga pagkapriso nga di momenos sa unom ka buwan ug di mosobra sa duha ka tuig o multa nga di momenos sa P500 ug si molabaw sa P5,000. Mahimong dungan nga ipahamtang ang silot sa pagkpariso ug multa segun sa kabubut-on sa husgado.
Samang pahimangno gipahayag ni Commission on Elections (Comelec) Spokesperson James Jimenez. Matod pa niya, ang mga campaign materials sa mga kandidato mahimo lang nga ibutang sa common poster areas.
Si Jimenez niingon nga gidili ang pagbutang sa mga campaign materials sa mga kahoy, light posts, electrical wires, mga eskuylahan, mga waiting sheds, aseras, mga taytayan, barangay halls, health centers, mga terminal, airport, pier, patrol car sa gobyerno, mga ambulansiya, tren ug estasyonan sa tren, overpass ug underpass ug mga center islands.
Ag silot sa makalapas niini naglakip sa diskwalipikasyon sa kandidato ug pagkpabilanggo gikan sa usa ka tuig ngadto sa unom ka tuig nga way probation. Mahimo sab nga pahamtangan sa silot nga diskwalipikasyon sa paghupot og bisan unsang puwesto sa gobyerno ug pagtangtang sa katungod sa pagboto.
Ang mga posters gilimitihan sa gidak-on nga 2 feet by 3 feet. Lakip sa pagasilotan ang mga printer niadtong mas dagko pa nga mga posters.
(edbarrita@gmail.com)