SUNOD-SUNOD ang operasyon nga gihimo sa kapolisan hilabina sa tibuok Northern Mindanao human mokabat sa 564 ka mga illegal drugs accomplishment ug illegal gambling u g pagsikop sa mga wanted person ang malampuson nga napahigayon sa tibuok bulan sa Abril ning tuig.
Gibutyag ni Police Superintendent Lemuel Gonda, tigpamaba sa Police Regional Office-Northern Mindanao nga sa gidaghanon nag-una ang Buukidnon Provincial Police Office ang adunay daghang natala nga moabot ngadto sa 147 diin 24 niini naaresto sa ginadili nga druga; 68 ang mga wanted person nga naaresto; 51 sa illegal gambling ug 25 ang naghupot sa armas.
Gisundan kini sa Cagayan de Oro City Police Office nga adunay 145 ka mga accomplishments gilangkoban sa 73 ka tao ang naaresto diin 46 niini drug bust, 47 ka mga wanted person, 100 ka tao nadakpan sa illegal gambling, ug unom ang naghupot sa armas.
Ang Misamis Oriental Provincial Police Office adunay 130 ka mga kalampusan nga 15 ang malampusong drug bust; 17 ang naaresto nga naglambigit sa ginadili nga druga; 65 ang nadakpan nga wanted person, 89 niini naaresto sa illegal gambling; lima niini naghupot sa ginadili nga armas.
Ang Misamis Occidental adunay 14 ka illegal drugs accomplishment; 37 ka mga wanted person nga naaresto; 29 ka mga illegal gambling activities nga nakasa; ug tulo ang naghupot sa armas.
Gisundan dayon sa Lanao del Norte Police Office adunay 40 ka kinatibuk-an nga accomplishment; 40 gihapon sa iligan City Police Office ug 4 sa Camiguin Provincial Police Office.
Sa laing bahin ang Regional Election Monitoring Action Center (Remac)-Northern Mindanao ang nihatag sab og update sa mga nadakpan ug nakuhaan og armas sukad gipatuman ang Comelec gun ban niadtong April 14 hangtod niadtong Lunes May 6.
Sa kinatibuk-an, moabot ngadto sa 150 ka mga armas ang nakuha diin 92 niini nakumpiska nga adunay usa ka M16 ug 91 ka mga short firearms. Sa maong gidaghanon 58 niini ang gisafe-keeping.
Gibutyag ni Gonda nga doble ang operasyon nga ilang gahimoun hilabina nga padangaton sab ang Sangguniang Kabataan ug Barangay Election.