NIHANGYO ang kapulisan ning dakbayan sa Cagayan de Oro sa katawhan nga saligan sila pinaagi sa paghatag og impormasyon kalabot sa mga ilegal nga kalihokan ning panahon sa eleksyon.
Gibutyag ni Police Senior Superintendent Nelson Aganon, ang city director sa Cagayan de Oro City Police Office (Cocpo), nga karong panahona maayo ang dagan sa peace and order sa dakbayan apan dili gihapon kini sila mokumpiyansa.
Gidugang pa niini nga gihangyo ang katawhan sa dakbayan nga makig-koordinar kanila pinaagi sa pagsumbong aron dali nga maaksiyonan ang problema.
“Pagdating naman sa criminality masasabi ko naman na manageable yung ating peace and order pero ni rerequest pa din natin yung ating miyembro ng komunidad na, mag-coordinate, magsumbong para makapagtrabaho tayo nang maayos kasi kokonti lang po ang pulis natin” pahayag ni Aganon.
Hangyo usab niini nga unta tabangan sa katawhan aron nga makab-ot ang tinuod nga kalinaw ug kahusay sa siyudad.
Gi-angkon niini nga dili pa-igo ang ilang mga personahe kung ugaling makadawat og mga text o tawag nga may kalambigitan sa eleksiyon sama na lamang sa pagpamalit og boto ug uban pa gawas na lamang kung mga armadong tawo ang anaa sa maong dapit diin kinahanglan nga daling marespondehan.