NAARESTO pinasikad sa warrant ang kanhi pulis nga no. 7 sa most wanted person sa Villa Trinitas, Bugo, dakbayan sa Cagayan de Oro.
Giila ang dinakpan nga si Police Officer 3 Patrick Paguillon, minyo, residente sa susamang dapit.
Si Police Senior Inspector Arlyne Ranario, tigpamaba sa Misamis Oriental Provincial Police Office, nibutyag sa SunStar SuperBalita nga nadakpan si Paguillon sa Villanueva Police Station ubos kang Police Senior Inspector Dennis Ebsolo.
Matud ni Ranario nga nakasohan kini si Paguillon ug illegal possesion og firearms ug rape niadtong tuig 2009 ug sugod niadto nag Awol (absent without leave) na dayon kini nga maoy hinungdan natangtang gyod sa iyang serbisyo isip sakop sa PNP Maritime Group 10.
Taodtaod sab ang pagpangita sa kapolisan ni Paguillon human wala na kini saktong residente.
Apan bag-o lang dihang adunay nakasulti sa kapulisan sa nahimutangan niini deretso dayon kining giambakan ug gisikop.
Matud ni Ranario nga gisuta pa kon unsa pay laing gikalambigitan ning pahona gawas sa giatubang niining mga kaso.
Ang dinakpan gi-turnover na karon panahona sa Cagayan de Oro City Police Office.