SULOD sa akong halos napulo na ka tuig nga pangalagad isip usa ka journalist, nagkalain-laing mga panghitabo sa palibot ang akong na-cover gikan sa ngilngig nga hitabo, sa kalamboan ug ngadto na sa hisgutanang politika.
Di na bag-o nako ang mo-cover sama sa gipamusil diin sa crime scene makita pa nako ang presko nga dugo, diha'y suicide nga nagbitay pa sud sa kuwarto, ug daghan pang uban.
Apan ang pinaka-ngilngig nako nga na-cover mao ang usa ka 2-anyos nga napisat tawon ang ulo ug nagpasad ang mga parte sa kalawasan tunga sa dalan Huwebes, Mayo 10, sa San Pedro Street, Davao City.
Migula sa video nga kuha sa closed-circuit television (CCTV) camera nga gimuntar sa dapit, makita nga motabok na unta ang mag-inahan dihang iyang gibuhian ang iyang anak ug kalit kining midagan ug maayong pagkaligis niini sa armored vehicle.
Sangko sa langit ug walay kabutangan sa kasuko sa inahan sa iyang kaugalingon, diin ang pagtulun-an ngari, kinahanglan nga sa sama niini nga edad sa bata, kuguson gyud, labi na kung motabok sa mga kalsada.
Dihang miduol ko sa inahan, nakita niya nga sakop ko sa media pinaagi sa akong ID. Misaysay siya nako sa hitabo ug wala nako nangutana pa kaniya, gipasagdan nalang nako siya nga mopagawas sa iyang bahin, gumikan anaa siya sa kasubo.
Sa iyang pagsaysay, bisan nag-atubang ug nagtan-aw ko niya, dili siya ang naa sa akong hunahuna, kundi ang akong apuhan -- ang akong lola nga gisama ug gihigugma na nako nga usa ka inahan.
Sa inahan sa bata, nakita nako sa iyang mata ang nangahulog nga luha sa pagmahay, pagbangutan ug luha sa kamingaw; sama sa mga luha nga nakita nako niadto sa akong lola dihang mibiya ko sa among balay ug milahi ko'g puyo kay kining gusto lagi motuman sa gusto.
Sa mga adlaw nga seguro mga 3-anyos pa ko, nahinumdoman na nako ang mga nahitabo sa palibot. Di gyud na gusto akong lola nga mogawas ko sa balay kay basin madagma ko, unya iyaha gyud ko nga kuguson, kanang kugos nga palingkuron sa iyang bukton, ipasandig sa iyang tiyan ug pugngan ang akong dughan, unya i-akin-akin dayon nako akong tiil.
Bisan og mga 5-anyos na seguro ko, magsige gyud og yawyaw si lola sa akong mga uyoan ug iyaan kay nganong dili ko bantayan basin daw modagan ug mahagbong ko.
Throwback Thursday ang drama (hehehe)! Samtang nagsuwat ko niining maong artikulo, akong nasiplatan sa akong desk calendar nga dunay nakamarka sa Mayo 13, dunay nakabutang nga Mother's Day.
Sa mga anak diha nga naa pa si mama nato, itimbaya na siya (hehehe), pero alang nako, kada adlaw Mother's Day kay di gyud mabayran ang ilang sakripisyo gikan sa pagbuntis nila nato padung sa pag-atiman sa bata pa hangtud nga manukol nata nila.
Kanimo, Mama-Lola, kung hain kaman karon uban sa atong Diyos, sorry sa tanan nga nahimo nako, Ma! Salamat sa tanang sakripisyo gikan sa pag-atiman nako sa bata pako hangtud sa akong pagtungha ug salamat sa akong mama gayud, si Mama Inday, sa pag-atiman nako sud sa siyam ka bulan dihang anaa ko sa imong sabakan.
Ug ning adlawa, salamat sa Diyos sa maayong panglawas nga iyang gihatag kanako sud na sa tulo ka dekada ug usa ka tuig nga pagselebrar sa mabungahong kinabuhi sa kalibutan. Sa mga inahan, happy Mother's Day sa tanan!