DEAR Noy Tikyo,
Maayong adlaw. Magpatambag unta ko nimo bahin ning akong gisagubang nga problema. Tagoa lang diay ko sa ngalan nga Britni, 25 anyos.
Duna koy uyab niadtong high school pa ko. Best friend nako siya, apan nagka-develop ug nagkasabot ang among mga pagbati.
Nagkauyab mi og unom ka bulan, apan nagkalagyo kay gusto siyang paeskuwelahon sa iyang ginikanan didto sa Cebu.
Matud niya mobalik ra siya human og eskuwela. Misaad sab ko niya nga ako siyang paabuton.
Apan human ang upat ka tuig gikan sa iyang paglakaw ug hangtud karon wala pa man siya mobalik. Di na pod nako makontak ang iyang selpon sukad nga milakaw siya.
Karon dunay nanguyab nako. Nahulog na hapit ang akong pagbati ning lakiha kay buotan ug nasuod ko na pag-ayo.
Kini ang naghatag nako og kalibog kay nisaad ko sa akong uyab nga ako siyang paabuton. Unsaon man ni nako? Magpaabot pa ba ko sa akong uyab o dawaton na lang ang gugma ning nangulitawo nako karon?
BRITNI
*****
Britni,
Lisud og magpaabot sa tawo nga wala ka na masayud kon mobalik pa ba o di na. Tinuod mipasalig siya nimo nga mobalik, apan how sure you are nga wala pa siya makakita og lain sa maong gidugayon nga panahon ug ikaw pa gihapon ang naa sa iyang kasingkasing, susama sa imong gibuhat ngadto niya. Maayo man god unta to og constant ang inyong communication bisan og layo siya kay segurado ka nga ikaw pa gihapon ang naa sa iyang kasingkasing.
Para nako kon nahigugma pa siya nimo, siya untay mo-initiate og contact kanimo kay nasayud man siya kon asa ka karon. Di na siya mag-expect nga ikaw ang mohimo niini kay wala ka na may number ug wala ka masayud kon asa siya karon pangitaon.
Puriso if you think nga you need to move on na sa inyong relasyon, take the risk. Kana kon segurado ka na sa imong pagbati nianang nangulitawo nimo karon. Ayaw hikawi ang imong kasingkasing nga magmalipayon.
Tingali di ka mabasol kon ugaling mobalik ang imong uyab dinhi ug he will find out nga duna ka nay laing hinigugma.
NOY TIKYO