“Mao na ang inahan, kung kanus-a bitaw moundang ang pagpitik sa atong kasing-kasing mao pud na’y pag-undang sa atong obligasiyon sa atong mga anak” - Yolanda Lariosa
WALAY bisan kinsa nga makatugkad sa gugma sa usa ka inahan ngadto sa anak ug walay makahulip sa importanteng papel niini pagmatuto sa iyang mga anak.
Sama na lamang sa 77 anyos nga si Yolanda Lariosa nga lumad nga taga Zone-1, Barangay Patag ning siyudad sa Cagayan de Oro.
Si Lariosa ning bag-o lang nag-viral sa social media human gi-post sa iyang silingan ang hulgway niini nga nangunay pagpamilit sa iyang campaign materials ginamit ang recycle nga mga tarpaulin human kini nagpapili pagka kagawad sa barangay.
Gibutyag ni Lariosa sa Sun.Star Superbalita kung unsa ang pinaka-importanteng papel sa inahan ngadto na sa iyang mga anak.
“Ang pinaka importante nga papel nako is tan-awon ko sila bisag dagko na sila karon, tan-awon ko gihapon sila unsa’y kulang nila, mao na ang inahan, kung kanus-a bitaw moundang ang pagpitik sa atong kasing-kasing mao pud na’y pag-undang sa atong obligasiyon sa atong mga anak,” matod ni Lariosa.
Nag-inusarang gipadako ni Lariosa ang siyam niini ka anak human nabalo sa dihang namatay ang bana niini.
Katorse anyos ang kamagulangan niini ug usa pa ka tuig ang kamanghoran sa dihang namatay ang iyang bana.
“Moadto mi didto sa subdivision, manglabada ko didto, may manang manglabada og inadlaw kay pagkahapon tagaan man kag imong kan-unon, kay naa na’y ilang pameliti ug ipalit og bugas,” dugang pahayag niini.
Giingong gisudlan niini ang bisan unsa nga trabaho aron lamang nga mabuhi ang siyam niini ka mga anak.
“Nanahi ko ug naglabada ug manghilot bisan unsa nalang diha nga maka kwarta ko para naay ilang magamit nga pag eskwela, usahay gabaligya og sud-an sumala lang akong mahimo ba nga mabuhi sila kay siyam biya sila,” dugang pa niini.
Pinakalisod nga nasinati-an niini isip usa ka inahan panahon nga magkasakit ang mga anak ug wala’y ipamalit og tambal lakip na usab kung wala na’y lung-agunon.
“Kanang magkasakit sila nga wala ko’y ipalit og tambal, unya kana bitaw isa nalang ka lung-ag among kan-on? Diha na makaingon ko nga Lord tan-awa sab ko diri kay nag-ingon bitaw Siya sa Jeremiah 33:3 nga “Tawgon mo ako kay ako motubag kanimo ug ipakita ko nimo ang katingalahang butang nga wa pa nimo masayri,” dugang niini.
Gisalig tanan ni Lariosa ang tanan sa Ginoo hinungdan n ga nagpabilin kining lig-on sa tanang pagsulay.
“I will not cry just for worries, I will cry just to release the extra fluid of my body, drink tanduay and cry, diba mag inom? ah hilak na kay malumos ang kasing kasing kung di ka mohilak, ang akong kaugalingon isalig gyud nako sa Ginoo, ang tanan akog gisalig kay naa biya’y uban nga walay anak,ako daghan kog anak gikuhaan pa gyud ko niyag bana,” ang pasi-aw niini nga pahayag.
Migradwar si Lariosa sa Bulua sa Elementarya gikan sa Grade 1 hangtod sa Grade 6 nga usa ka Valedictorian ug lakip na usab sa High School sa Lourdes Collega diin gigastohan kini sa mga madre.
Giingong nakatungha usab siya kani-adto sa kolehiyo sa kurso nga AB English.
Nagserbisyo usab kini sa mga madre sulod sa napulo ka mga katuigan apan wala nakita ang kaugalingong nga magmadre tungod usab kay buot niini nga maminyo.
Anaa pa kini sa pangidaron nga 17 anyos sa dihang naminyo ug nabalo human sa 18 ka mga katuigan nga kaminyoon.
Napuno usab sa mga libro ang gamay nga pinuy-anan niini gumikan kay usa kini ka wide reader, writer ug gani usa kini ka private journalist diin nakasulat na og pipila ka mga article.
Mapasigarbuhon usab kining mibutyag nga namahimong defending champion sulod sa 14 ka mga katuigan diha sa amateur hour nga gitawag og Hagdanan sa Kabituonan kay lage aduna man usab kini maanindot nga tingog nga nakatabang-tabang usab matud pa kaniya kaniadto.
Respetohon ang anak
Alang kang Lariosa dakong sekreto niini isip usa ka inahan mao nga ang paghatag og respeto ngadto sa iyang mga anak. Wala man nakahuman ang mga anak gawas sa usa niini kay lage nag-inusara kining nagpadako sa siyam ka mga anak apan swerte kini sa mga anak gumikan kay makita niini ug mabati-an ang pagpalangga ngadto na kaniya.
“Ako na inahan gyud ko nga bali single mother sa siyam ka anak ang ako lang ikasulti sa mga ginikanan nga please respect your children, ayaw gyud kasab-i ang imong anak sa daghang tawo, ayaw gyud sila ipahiya sa daghang tawo kay magrebelde sila,” ang tambag niini.
“Kung naa kay kasuko tawaga siya sa taas, you speak one on one,do not do it again please, para respetohan pud ka ,I never shout to them, never, akong gapamati-on sa ilang problema” dugang pa niini.
Giingong lahi-lahi og kina-iya ang matag-usa niini apan iya kining gisabot ug gapaminawon ang ilang mga problema lakip na ang problema sa gugma.
“Kana raba akong mga bata silang siyam wala biya na nakasuso sa ako kay naa man koy sakit, nganong mahal man ko nila? Kay ngano palangga ko man sila, nakita man nila ko nga palangga ko sila, palangga sab nila ko” ang mapasigarbuhon nga pahayag niini.
Giingong nabati usab niini ang paghigugma sa iyang mga anak ilabi na kung aduna kini bati-on dali kini silang modapog bisan nga anaa na sa mga lagyong dapit.
Samtang gibutyag sa 53 anyos nga anak nga si Melcedes nga bulahan kaayo sila nga aduna’y inahan nga susama ni Yolanda nga wala kini nagpasagad kanilang siyam ka magsoon bisan nga nag-inusara lamang kini.
“Blessed kaayo mi ni mama, bisan unsa na la’y raket intawon sa bata pa mi, uban pud ko didto sa iyaha,10 years old ko uban uban ko ni mama,usahay manuroy siya og utan nangka” ang emosiyonal nga pahayag niini.
Alang sa mga ginikanan ilabi na sa usa ka inahan dako na kaayong ganti nga makitang malipayon ug haruhay ang mga anak. Busa alang sa mga anak, suklii ang paghigugma ug sakripisyo sa usa ka inahan pinaagi sa pagpangga ug pagrespeto ngadto na kanila. Happy Mother ’s Day sa tanang inahan!