UBAY-UBAY ka mga pulis ang gitakdang ipakatag alang sa umaabot nga Barangay ug Sangguniang Kabataan (SK) eleksyon karong Lunes, Mayo 14.
Sa pakighinabi sa Sun.Star Superbalita kang Police Superintendent Mardy Hortillosa, tigpamaba sa Cagayan de Oro City Police Office (Cocpo), nga ubay-ubay ang ipakatag nga mga sakop sa kapolisan sa mga voting centres sa adlaw mismo sa eleksiyon.
“Atong deployment karon more than 300 sa mga polling precinct lang na siya, enough na na siya nga mga personnel nga ma-deploy sa atong mga polling centre “pahayag ni Hortillosa.
Gawas niini adunay laing 400 ka mga polis ang magsuroy suroy aron malikayan ang kagubot sa syudad ilabi na sa lugar nga taas ang kaso sa krimen.
“Katong personnel nga ma deploy sa police visibility nato sa anti-criminality sa security measures nato naa pud ta’y 400 kapin, katong mga dalan nga gitoohan nato nga naa didto ang mga krimen nga mahitabo, gibutangan pud nato didto para di ma vacuum ang atong seguridad ,anti-criminality security measure nato dinhi sa siyudad” dugang pa ni Hortillosa.
Giingong padayon gihapon ang hugot nga seguridad nga gipatuman hangtod karong panahona aron nga malampuson ug malinawon nga mahuman eleksyon.
“The same gihapon atong kahugot sa atong security measures nga gipa-implement ang atong security measures, Comelec checkpoints, atong police visibility, atong random Comelec checkpoint sa matag police station, atong intelligent monitoring, atong coordination sa atong counterpart sa atong Philippine army, Task Force Oro,” saysay niini.
Nasayran nga ubay-ubay ka mga otoridad sa nagkadaiyang mga unit ang ipakatag sa adlaw sa eleksiyon ug aduna usab kini sila’y gimugna nga quick reaction team diin mao kini ang moresponde sa panahon nga aduna’y mga dagkong panghitabo.