UNANG adlaw human sa piniliay sa Barangay ug Sangguniang Kabataan. Nangatulog pa karon kadtong nangaparot kay di makaako nga maminaw pagbalik sa kamatuoran.
Kadtong mga nidaug mas nangatulog pa aron dili singilon sa wa pa nila nabayri nga volunteers.
Ang uban nangatulog aron mobalik ang ilang kalagsik human sa usa ka semana nga mainit nga kampanya.
Ang wala lang nakatulog ron kadtong kandidato nga naparot nga dako og gasto.
Naa koy nahibal-an nga nidagan og kapitan sa Agdao nga hapit P3M daw ang gasto gikan campaign period hangtud sa pagbasa sa balota.
Sumala sa akong mga impormante nga nanganti ang maong kandidato nga bahaon niya og kuwarta ang ilang barangay aron modaug bisan nangiwit siya sa survey ug gamay ra ang nitambong sa ilang pulong-pulong. Nagsugod na tingali siya karon ug panudya sa iyang mga lider nganong napildi pa siya o kaha gipangbawi ang butang nga napalit sa iyang lider gikan sa iyang kuwarta.
May nidangan pagka-kongresista kaniadto nga gipangbawi ang TV, refrigerator, gas stove, PD Cab ug uban pa gikan sa iyang mga lider human siya naparot.
Sulti pa niya nga gibulsa sa iyang mga lider ang kuwarta busa wa mobotar kaniya ang mga bayaran. Gawas sa bugas ug gimatada nga baka, gipanghatagan pa niya'g cash ang iyang mga lider nga hayahay pa sa security guard.
Sa laing bahin, bisan tuod nga nagmalampuson ang piniliay karong tuiga, adunay mga maduguong hitabo sa palibot.
Gibalita niadtong niaging Biyernes, nga nikabat og sobra 20 ka nidagan nga kapitan sa nasud ang nabugha.
Apil ang Davao sa listahan. Niadtong Sabado sa buntag, napatay si Kapitan Antonio Guatno sa Barangay Pangyan, Calinan District. Daghang bersyon sa iyang pagkamatay. Naay nag-ingon nga gi-serve daw sa CIDG ang Search Warrant sa iyang panimalay tungod sa paghupot og dili lisensiyado nga armas.
Kanhi sundalo si Guatno nga nahimong kapitan nga maoy nakapalambo sa ilang lugar pinaagi sa daghang proyekto. Nisukol daw kini mao nga napatay sa mga operatiba nga nagdala sa warrant.
Naa say bersiyon nga gitulis siya sa iyang panimalay kay naa tingali kuwarta nga iyang gitaguan nga gamiton sa eleksiyon.
Sa laing bahin, anaay huhungihong nga resulta sa kampanya batok ilegal nga druga ang iyang pagkamatay.
Sayod ang tanan nga "drug surrenderer" ang Kapitan ug iyang gilimpyohan ang iyang barangay sa gidili nga druga.
Sulti nila nga basin anaa pa siya sa listahan mao nga napatay kay nisukol. Ambot kung kanus-a mahuman kining tradisyon sa Pinoy nga samok, gasto ug maduguong piniliay? Unta ipaagi na lang sa ripa o bunot-bunot ang pagpili sa lider.
Motakda lang ang Comelec og patakaran sa pagdagan unya ang tanang pangalan sa kuwalipikado isulat sa ping-pong ball unya ipabulhot sa hangin sama sa gihimo sa Sweepstakes og Lotto nga makita nato sa TV. Wa nay gasto ang gobyerno og kandidato.
Ang seguraduhon lang mao nga klaro ang kuwalipikasyon sa kandidato nga basihan sa pagpili kanila nga maapil sa ripa ug limpyo ang proseso sa pagripa pinaagi sa ping-pong ball. Puwera samok gasto ug patay di ba?