SECTIONS
Wednesday , May 23, 2018
SUPERBALITA DAVAO

Mga patay miboto

DAVAO. Nagtapok ang mga botante sa Barangay 23-C, Mini Forest Gym sa pagsugod sa ilang pag-botar kagahapon sa gihimong mga polling precincts sa Commission on Elections (Comelec). Ang Brgy. 23-C giapil sa 55 ka Election Watchlist Areas (EWAs) sa Davao City Police Office (DCPO). (Macky Lim)

NAKURAT ang mga residente sa Barangay 15-B Poblacion sa Davao City human pipila sa ilang mga silingan ug kabanay nga dugay nang nangamatay ang nakaboto sa pinilaay adlaw’ng Lunes.

Usa ka nagpakabanang residente nga si Imelda (nagpatago sa iyang bansagon), residente sa Boongon Street nga nahinabi sa SuperBalita nasagmuyo sa nahitabo.

"Dugay nang namatay akong iyaan, natingala ko kay naa pa iyang pangalan sa listahan sa gawas nga 8 years na siyang namatay, unya kay parehas man mi og presinto, gipalili nako, nahuman na siya og boto, nakapirma na siya," ingon ni Imelda.

Si Mario (nagpatago sab sa iyang bansagon) kinsa misaysay nga susama sab ang ilang presinto sa iyang inahan ug nagtapad ilang pangalan sa listahan, apan nakurat sab siya dihang duna nay pirma ang pangalan sa iyang inahan.

"Natingala nalang gani ko nga wala ko gipangitaan og ID sa mga maestra didto nga BEI, diretso ra kaayo," sulti ni Mario.

Nasubay sab sa SuperBalita gikan sa mga tawo nga nangita sa ilang mga pangalan sa University of Southeastern Philippines (USEP), Barrio Obrrero, Davao City nga dunay mga nangamatay na apan anaa lang gihapon ang ilang mga pangalan sa listahan.

Mokabat 18 ka mga pangalan sa mga nangamatay na ang anaa pa sa masterlist sa USEP nga gituohang mga residente sab sa Barangay 15-B gikan sa mga precinct number 233-A padung na sa 247-A nga mga presinto.

Migula sab ang problema sa samang mga polling precincts nga dunay mga buhi pa, apan wala gyud ang ilang mga pangalan bisan og i-search sa Comelec finder applications.

Tungod sa maong hitabo, ang pipila ka mga residente sa maong barangay mopaabot niini nga problema sa buhatan sa Commission on Elections (Comelec)-Davao Region aron masulbad ang maong reklamo.

Sa naunang pakighinabi kang Comelec-Davao Region assistant director Atty. Marlon Casquejo nga ilang subayon ang maong problema aron madugangan ang ilang pag-update sa listahan sa mga botante.

Nagpahimangno ang Comelec nga human sa eleksyon mamahimong moadto sa ilang buhatan ang mga kabanay nga dunay miyembro sa pamilya nga nangamatay na aron matanggal ang ilang mga pangalan sa listahan.

"Alegasyon mana siya, so kung naa may ingon ana nga hitabo, moadto sila sa atong buhatan magdala og death certificate aron atong makuha ang ilang mga pangalan sa listahan," ingon ni Casquejo.

Pahimangno sab sa Comelec nga makanunayon ang pagbotar aron mamahimong updated gayud kini ug di matanggal sa ilang database.

Hinuon, nagmalinawon ang piniliay kagahapong adlawa, luyo nga dunay gikataho nga dunay mga barangay sa ikatulong distrito ug sa ikaduhang distrito nga dunay wala pa ka check-in sa pag-abli sa ilang mga polling precincts.

Apan gipasabot sa Comelec pag Lunes nga dunay mga higayon nga dili sila makapa-check-in gumikan hinay ug walay signal sa mga hilit nga dapit ning dakbayan.


VIEW COMMENTS