SEGUN sa ulahing report ni Philippine National Police (PNP) chief director Oscar Albayalde, dunay 33 ka mga kasong pagpatay nga gidudahang may labot ang eleksiton sa Barangay ug Sangguniang Kabataan.
Sa nangamatay, 18 niini mga incumbent officials.
Kabahin na gyud ni sa atong kultura matag higayon dunay eleksiyon duna say patay?
Lisod ba gyud ni undangon. Magpista tingali ang langit kon walay mangamatay samtang nagsingabot ang eleksiyon.
Sa akong paniid, moabot na ngadto sa nilibo ang nangamatay duha ka adlaw sa wa pa gani ang eleksiyon.
Nikatap ang mga reports sa pagpamalit og boto sa nagkadaiyang dapit sa nasod.
Mismo kining mga nagpapili sa barangay, gipatay na nila ilang kaugalingong maayong taras ug mithi, gihulip niini ang kahakog og kadaotan.
Unsa may tumong sa pagpamalit diay og boto, siyempre aron modaog nga kontra sa kabubot-on sa katawhan.
Kon moasumir ka og pwesto sa gobiyerno nga nakuha pinaagi sa pagpanikas, unsa may kaayohan nga atong mapaabot niana.
Mas ngilngig palandongon kining tala sa mga nangamatay pinaagi sa pagbaligya sa ilang boto ngadto sa mga hakog og gahom nga mga kandidato.
Gipangpatay nila ilang maayong kaugmaon sa kamot sa matinud-anon nga kandidato, baylo sa pila lamang ka pesos.
Mao ni ang pait nga sitwasiyon sa nahitabong masaker matag eleksiton. Nagkadaghan ang nangamatay – bag-ong botanti, betarano nga botanti, bag-ong kandidato, o beteranong kandidato – walay mapili.
Tungod sa kadaghang patay, mapaabot nato nga molukop ang baho sa patay sa atong palibot. Langsa na kaayo ang paghanggap nato sa hangin sa tinuod nga demokrasya.
Kay bisan mas daghan ang nagpakabuhi pinaagi sa pagbarog sa ilang dignidad, moalisngaw gyud ang baho sa patay bisan unsa ka gamay niini.
Hangtod kanus-a kaha maundang kining problema sa eleksiyon? Unsa may epektibo nga solusiyon aron mawala na kining pagpanikas, pagpamintaha ug pagpanlupig.
Ingon ani na ba gyud ni, nga panahon sa eleksiyon kadtong kwartahan ug tikasan, mahariharion, bagsik, impluwensiyado, daghang kaalyado maoy makabentaha bisan walay klarong plataporma de gobiyerno.
Kining mga opisyal sa barangay mao untay mopasiugda pag-edukar sa mga botanti o katawhan kabahin sa tinunay nga pagbotar nga limpiyo ug matinud-anon. Apan, kon tikasan nga kandidato atong ibutang sa puwesto, unsaon pag-edukar nato sa katawhan. Busa magpabilin gihapon ang problema.
Hangtod sunod eleksiyon, padayon tag ihap sa mga patay.