SUPERBALITA CAGAYAN DE ORO

Rodriguez midaug batok Nacaya

NIGAWAS nga mananaug pagka-kapitan sa Barangay Nazareth, dakbayan sa Cagayan de Oro si Maximo II "Jon Jon" Rodriguez batok sa iyang kontra nga si Reina Nacaya.

Giproklamar na si Rodriguez kinsa nakakuha og 3,129 nga boto batok sa 1,674 nga total votes ni Nacaya basi sa talaan sa Barangay Board of Canvassers (BBOC).

Kahinumduman nga init kaayo ang matag-kampo atol sa election period human gipasakaan og petisyon si Nacaya may kalambigitan sa isyu pagkwestiyon sa iyang residensya.

Ug sa adlaw gyud sa piliay dunay gamay nga tensyon nga nahitabo tali sa duha ka gma grupo apan dali ra kining naresolba.

Samtang nigawas nga number one kagawad si Jocelyn Rodriguez, iyaan ni Maximo II. Nidaug usab pagka-kagawad sila Bernadette Salinas, Eduardo Rubic, Henry Madria, Clarissa Guidaben, ug lakip na usab ang duha ka napiling kagawad gikan sa partido ni Nacaya nga sila Vincent Chavez ug Rafael Jose Quiblat.

Dako ang pasalamat sa partidong Rodriguez sa katawhan nga mibotar, ilabi sa mga tig-suporta niini sa walay puwas nga pagsalig ug lauman nga buhaton niini ang angayan, ilabi na sa paghatag og saktong serbisyo alang sa katawhan. (Franck Dick A. Rosete, Phinma-COC intern)


VIEW COMMENTS