NATAPOS na gayud ang Barangay and Sangguniang Kabataan Elections dinhi
sa Pilipinas.
Dunay nalipay kay midaug, duna say naguol kay napildi, ug duna pa gani namatay nga kandidato human nasayud nga pildihonon siya.
Sa mga probinsya, managlahi ang dula sa kampanya aron modaug sa eleksyon. Ambot nganong ila man gyud ning awayan nga diyutay ra man ang honorarium sa barangay?
Hinuon, magdepende kini sa gidak-on sa Internal Revenue Allotment (IRA) sa barangay. Ug suma pa, gihimo na kining panginabuhian sa uban, pwera lang sa maayo.
Subay sa akong nasagap nga balita, dunay Kongresista nga naneguro nga naay lig-on niyang lider sa 2019 eleksyon mao nga bisan non-partisan ang eleksyon sa barangay, apan naa gyud siya'y gimanok sa eleksyon.
Iya kining gihimo aron di siya mapapha sa posisyon nga gikuptan sa karaang politiko, kay kung mahitabo nga mapildi siya, basin sa lunangan unya siya puniton.
Usa sa iyang estratehiya mao ang pagbubo og minilyon nga kantidad sa barangay eleksyon. Mga kandidato sa pagka-kapitan giingon nga gihatagan tag P50-mil isip tabang sa kampanya.
Nabaniog sab nga grabe ang vote buying sa maong probinsya nga gihimo sa kampo ning maong Kongresista. Hala ka diha, Sir, vote buying ning imong gihimo ug kalapasan kini sa Omnibus Election Code.
Unsay atong lauman ning mga kandidatoha nga sinugdanan pa lang, wa na nagtamod sa 8 Norms of Conduct for Public Official and Employees?
Dako kini nga trabahuon sa Department of Interior and Local Government (DILG) nga itisok sa huna-huna ug kasing-kasing sa opisyales sa barangay ang maayong values
sa serbisyo publiko.
Kay bisan unsaon ni Presidente Rodrigo Duterte pagpakaylap sa kampanya kontra kurapsyon -- kon di matul-id kining mga opisyales nga dako og gasto sa eleksyon -- di gihapon maundang ang kurapsyon.
2 Asec gipa-resayn
Si Presidente Rodrigo Duterte buot nga moluwat sa katungdanan sila Justice Assistant Secretary Moslemen Macarambon Sr. ug Public Works Assistant Secretary Tingagon Umpa tungod sa alegasyon nga kurapsyon.
Subay sa imbestigasyon sa Presidential Anti-Corruption Commission, si Macarambon giingon nga kanunay ni-interbenar sa mga smugglers og bulawan ug mga alahas sa Ninoy Aquino International Airport sa Pasay City.
Si Umpa, sa laing bahin, nangayo og salapi sa mga kontraktor isip porsyento sa mga proyekto nga gi-award kanila.
Ang nindot niini, kung tinuod man, di lang paphaon sa pwesto kundi bilangguon gyud sa sala nga kurapsyon.