SECTIONS
Wednesday , May 23, 2018
SUPERBALITA DAVAO

2 bala sa mortar gipabuto atol sa brgy., SK elections

KIDAPAWAN CITY -- Gituohan nga grupo sa Bangsamoro Islamic Freedom Fighters (BIFF) ang nagpabusikad og bomba atol sa Barangay ug Sangguniang Kabataan elections sa managlahing lugar sa probinsiya sa North Cotabato niadtong Lunes.

Gikanayon ni Superintendent Bernard Tayong, tigpamaba sa North Cotabato Cotabato Police Provincial Office, nga unang gitay-og sa makusog nga pagbusikad ang Purok 7, Sitio Public, Barangay Dungos, Tulunan sa utlanan sa General Salipada, Pindatun, Maguindanao Province alas 10:30 sa buntag.

Samtang ang ikaduhang pagbusikad nahitabo 11:20 sa buntag, usa ka kilometro ang gilay-on gikan sa Dungos Elementary School.

Hinuon, walay gitaho nga mga naangol sa pagbusikad apan nakamugna kini og tumang kahadlok sa mga molupyo.

Nasayran, base sa pagsuta sa militar ug kapulisan, uban sa mga sakop sa Explosive Ordnance Disposal Team sa Philippine Army, mga bala sa 60 mm mortar ang mibusikad.

Nagtuo ang mga awtoridad nga pagpanghadlok lang ang motibo sa BIFF sa pagpabusikad sa mga bala sa mortar sa mga nahisgutang mga lugar.

Sa pikas bahin, gibutyag sa mga opisyal sa Commission on Election sa North Cotabato nga malinawon ug hapsay ang piniliay sa probinsiya. (Edgar Fuerzas)


VIEW COMMENTS