SECTIONS
Wednesday , May 23, 2018
SUPERBALITA DAVAO

Usman midaug; Manding namatay sa Barangay 23-C

GIDEKLARA nga mananaug sa Barangay 23-C, Mini Forest, Davao City ang kasamtangan nga Kapitan Alemudin Wating Usman.

Sumala ni Kapitan Usman nga dako ang iyang pasalamat sa katawhan sa Barangay 23-C sa subling pagsalig kaniya bisan pa man mokabat lamang sa 900 ang kulang sa mga boto sa iyang kaatbang nga si Amilbangsa Manding.

Giingon ni Usman nga nasubo usab siya sa pagpanaw ni Manding alas 6 sa gabii, adlaw sa eleksyon, gumikan pulos sila mga Muslim sa maong barangay nga nagbangi sa politika.

Si Manding ulahing mibotar sa iyang presinto sa Mini Forest gym ug milahos sa usa ka hotel sa Jose P. Laurel Avenue aron magpahulay apan wala na kini nakamata mao nga gituohang nag cardiac arrest.

Sa pakighinabi sa mga tigbalita sa kampo ni Manding, ilang gipahid ang pagkamatay ni Manding ngadto kang Usman sanglit nakadugang sa gibati nga kaguol ni Manding ang nahitabo niadtong Sabado nga duha sa mga supporters niini ang giingong gipamusil sa kampo ni Usman.

Apan gipaklaro sa kampo ni Usman nga una nahitabo ang kasamok niadtong Sabado, daan na silang nakapa-blotter sa Sta. Ana Police Station sanglit giingong gi-harass sila sa kampo ni Manding ug dili sila ang namusil niadtong Sabado.

Gihugon-hugonan karon nga mopasaka og protesta ang kampo ni Manding batok kang Usman, apan sumala ni Usman, andam niya kining atubangon bisan asa.

Ang patay nga lawas ni Manding gidala sa Lanao kagahapon aron didto kini ilubong. (Jeepy P. Compio)


VIEW COMMENTS