SECTIONS
Sunday , May 20, 2018
SUPERBALITA CEBU

3 patay sa bangga sa bus, motor

Bangga. Patay diha-diha ang tulo ka mga tawo dihang nunot sa panagbangga sa motorsiklo ug Ceres bus. Ang anaa sa hulagway mao ang mga sakay sa motorsiklo nga ang duha niini mga bata. (Paula Schell)

TULO ka mga tawo, duha niini mga bata, ang nangamatay sa panagbangga sa usa ka motorsiklo ug bus kagahapon sa mga alas 5:40 sa hapon sa Barangay Pasil, lungsod sa Santander, habagatang Sugbo.

Duha ka mga motorsiklo gikatahong naglumba sa wa pa ang aksidente.

Si P/SInsp. Margenette Yosores, hepe sa Santander police, niila sa nangamatay nga sila si Gery Yrat, ulitawo, taga Tan-awan, Oslob; Scott Cagaw ug Kirk Oyam, pulos 14 anyos, managsilingan sa Bongkogan, Oslob.

Samtang ang driver sa Ceres bus ( 0712-08) nga nakadasmag giilang si Anolito Tero, 54, taga San Remegio, amihanang Sugbo.

Matod ni Yosores nga ang bus gikan sa dakbayan sa Sugbo padulong sa wharf sa Liloan, Santander.

Ang mga biktima nag-angkasay sa usa ka motorsiklo nga gikataho nga dunay gikalumba nga laing motorsiklo.

Ni-overtake ang duha ka mga motorsiklo sa usa ka dakong trak, apan ang uwahi nga motor nakabalik sa agi.

Ang gisakyan sa tulo ka mga biktima wa na makabalik sa agi tungod sa kakusog sa ilang dagan.

Si Yosores niingon nga wa na makabawi si Tero nga nagsubay sa iyang lane kay kusog kaayo ang dagan sa motorsiklo.

Nagkabangga ang duha ka mga sakyanan ug nangalabay ang tulo ka mga biktima.

Si Tero naa karon sa custody sa Santander police human motahan kanila. (GPL)


VIEW COMMENTS