SUPERBALITA CAGAYAN DE ORO

Nagbisikleta napasok sa trak, patay

PATAY ang usa ka lalaki human napasok ug nalatayan sa usa ka ten-wheeler dump truck samtang nagbisikleta pasado alas 4:00 sa hapon sa Gaabucayan street ning siyudad sa Cagayan de Oro.

Ang biktima naila nga si Camilo Nambatac Bayron, 47, ulitawo ug residente sa Zone-2, Osmeña street, Barangay 22.

Samtang ang nagmaneho sa ten-wheeler trak mao si Jhesil Apostol, 26, residente sa Coliseum, Carmen.

Sa nahipos nga impormasiyon gikan sa Police Station 3 (PS3) sa Agora nga kargado og yuta ang dump truck dihang napunggitan niini ang biktima nga sakay sa biseklita sa Triangle nga bahin sa Corrales junction.

Gumikan sa maong panghitabo, natumba ang biktima gikan sa gimanehong bisikleta ug nalatayan sa ligid, hinungdan sa hinanali niini nga kamatayon.

Samtang si Apostol nga nahinabi sa SunStar Superbalita midepensa nga una niini nga nakita ang biktima nga sakay sa bisikleta sa likod nga bahin sa dump truck apan nili-ot kini.

“Ang nahitabo ato, abay mi nga ten-wheelers tapos siya nakit-an nako sa sampot sa dump truck nako, pa straight mi tanan unya nikalit siya'g liko, unya katong kasugat niya nga sakyanan murag nataranta daw siya, nibalik, natumba iyang bike unya napasok sa ilalom,” pahayag ni Apostol.

Nasayran nga lima na ka tuig nga drayber si Apostol sa usa ka construction ug kini ang unang higayon nga nalambigit sa aksidente nga nikalas og kinabuhi.

Sa pagsulat niini nga balita, padayon pa ang imbestigasiyon samtang ang drayber kasamtangang nagtingkagol sa Police Station 3.


VIEW COMMENTS