SECTIONS
Sunday , May 20, 2018
SUPERBALITA CEBU

Riprap sud sa Ma. Luisa nahugno

Nahugno. Mga sakop sa Bureau of Fire Protection-Special Reaction Unit, Emergency Rescue Unit Foundation, Quick Response Team sa Cebu City Disaster Risk Reduction Management Office milimpyo sa nahugno nga riprap sud sa Ma. Luisa Subdivison. (Hulagway ni Nagiel Bañacia)

NAHAGSA ang gitukod nga paril daplin sa karsada sud sa Maria Luisa Subdivision nga gikaalarma sa mga molupyo sa miaging kaadlawon.

Kini human unang gika-report nga adunay construction worker nga natug ug natabunan sa mga bato ug semento atol sa hitabo.

Apan si Nagiel Bañacia, pangulo sa Cebu City Disaster Risk Reduction and Management Office (CCDRRMO), nagkanayon nga nahupay ang iyang kabalaka dihang gikumpirmar sa foreman sa construction company nga negatibo ang pagtuo.

“No construction worker is buried according to Danny Suares, foreman of Thunder Steel Construction,” tipik sa post ni Bañacia.

Ang report gidasonan usab sa post ni Mayor Tomas Osmeña sa iyang Facebook page.

“Contrary to earlier reports, all workers are accounted for. None were buried under the collapse. Clearing still ongoing,” matod sa post sa mayor pipila ka oras human sa pagkadahili sa gitukod nga riprap.

Si Bañacia nagpasalamat ngadto sa mga rescuer gikan sa Bureau of Fire Protection-Special Reaction Unit, Emergency Rescue Unit Foundation, Quick Response Team sa CCDRRMO kinsa maoy daling niresponde didto sa Paseo Norma Phase II, sa luho nga subdvision.

Gipahibawo sa pangulo sa CCDRRMO nga alas 3 sa kadlawon gisugdan ang search and rescue ug alas 7:20 na sa buntag nahibaw-an nga way trabahante nga natug duol sa nahitaboan.

Ang mga sakyanan paingon sa lugar nahitaboan wa makaagi hangtod nga nalimpyo sa tagdumala sa subdivision ang nangatumpag nga bato.

Susihon sa OBO

Gipadayag ni Engr. Josefa Ylanan balikon nila og susi ugma ug sayran kon kinsa ang tinuod nga pangalan sa giingong usa ka foreigner nga maoy nagpatrabaho sa riprap sanglit wa silay record nga nakita didto sa Office of the Building Official.

Mtaod ni Ylanan nga masayran karon kon adunay bay mga legal nga dokumento ang tag-iya sa lugar o ang contractor sama sa mga permit gikan sa ilang buhatan.

Gitahasan sa OBO ang contractor sa paglimpyo aron maagian og balik kagahapon ang dan ug mahibaw-an usab karon kon makapadayon pa sila og trabaho o di sa ilang gitukod nga riprap. (PAC)


VIEW COMMENTS